मुलुकलाई समृद्ध र भ्रष्टाचारमुक्त बनाउन सबै क्षेत्रको भूमिका आवश्यक : सभामुख अर्याल

BFIS News
2026 May 30 15:58

मुलुकलाई समृद्ध र भ्रष्टाचारमुक्त बनाउन सबै क्षेत्रको भूमिका आवश्यक : सभामुख अर्याल

काठमाडौँ, जेठ १६ गते । सभामुख डोलप्रसाद अर्यालले मुलुकलाई समृद्ध, सुशासित र भ्रष्टाचारमुक्त बनाउन सबै क्षेत्रको सक्रिय भूमिका आवश्यक रहेको बताउनुभएको छ।

शनिबार काठमाडौँमा आयोजित एक कार्यक्रमलाई सम्बोधन गर्दै उहाँले सरकार गलत दिशामा गएमा वा कार्यसम्पादनमा ढिलाइ भएमा घण्टी बजाएर सचेत गराउन सरोकारवालालाई आग्रह गर्नुभयो। सभामुख अर्यालले कानुन निर्माण प्रक्रियामा रचनात्मक सुझाव दिन तथा सरकारका कमजोरीप्रति समयमै सजग गराउन पनि जोड दिनुभयो।

मुलुकमा सुशासन स्थापना, भ्रष्टाचार नियन्त्रण र आर्थिक समृद्धि हासिल गर्ने लक्ष्य वर्तमान पुस्ताले नै पूरा गर्नुपर्ने उल्लेख गर्दै उहाँले भन्नुभयो, “हामीले हाम्रै पालामा मुलुकलाई समृद्ध बनाउनुपर्छ, भ्रष्टाचार अन्त्य गरी सुशासन कायम गर्नुपर्छ र हाम्रा सन्ततिलाई सुदृढ नेतृत्व सुम्पिनुपर्छ।”

निजी क्षेत्रलाई प्रोत्साहन गर्दै लगानीमैत्री वातावरण सिर्जना गर्नुपर्नेमा जोड दिँदै सभामुख अर्यालले वैदेशिक रोजगारीमा रहेका युवालाई स्वदेश फर्काउने वातावरण निर्माण गर्नुपर्ने तथा नेपाललाई लगानीका लागि उपयुक्त राष्ट्रका रूपमा विकास गर्नुपर्ने बताउनुभयो।

उहाँले नेपालका प्राकृतिक, धार्मिक तथा सांस्कृतिक सम्पदाहरूलाई विश्वसामु प्रभावकारी रूपमा प्रवर्द्धन गर्नुपर्ने बताउँदै लुम्बिनी, सगरमाथा, पशुपतिनाथ, मुक्तिनाथ, जानकी मन्दिर तथा पाथीभराजस्ता गन्तव्यहरूले नेपाललाई अन्तर्राष्ट्रिय पर्यटनको प्रमुख केन्द्र बनाउन सक्ने उल्लेख गर्नुभयो।

लायन्स क्लबको प्रसङ्ग जोड्दै उहाँले भन्नुभयो, “जसरी क्लबमा बिहानै उठेर घण्टी बजाउने गरिन्छ, त्यसैगरी सरकारलाई पनि घण्टी बजाएर कहाँ गलत हुँदैछ भनी सजग गराइदिनुहोस्। जनअपेक्षा र आवश्यकता अनुसार कानुन निर्माण गर्न प्रतिनिधि सभा र राष्ट्रिय सभाका सदस्यहरूलाई घच्घच्याउनुहोस्।”

सभामुख अर्यालले देशको संविधानलाई समयानुकूल बनाउन आवश्यक सुधार तथा संशोधनका विषयमा समेत ठोस सुझाव दिन आह्वान गर्नुभयो।