नेपाल लाइफको कर्णाली प्रदेशस्तरीय तारा अवार्ड सम्पन्न, ५४ अभिकर्ता सम्मानित

काठमाडौं । नेपाल लाइफ इन्स्योरेन्स कम्पनी लिमिटेडले सातै प्रदेशमा आयोजना गरिरहेको प्रदेशस्तरीय ‘तारा अवार्ड’ कार्यक्रमअन्तर्गत कर्णाली प्रदेशको कार्यक्रम सम्पन्न भएको छ। असोज १३ गते मंगलबार सुर्खेतस्थित होटल शुभमा आयोजित कार्यक्रममा ५४ जना अभिकर्तालाई तारा अवार्डबाट सम्मान गरिएको छ।

कार्यक्रममा करिब १५० जनाको सहभागिता रहेको कम्पनीले जनाएको छ। कर्णाली प्रदेशको कार्यक्रम सम्पन्न भएसँगै यस वर्षको प्रदेशस्तरीय तारा अवार्डअन्तर्गत सात प्रदेशका कार्यक्रम सम्पन्न भएका छन्।

अब असोज १५ गते बिहीबार पोखरास्थित पोखरा ग्राण्डमा गण्डकी प्रदेशको अन्तिम कार्यक्रम आयोजना गरिनेछ। उक्त कार्यक्रमसँगै आर्थिक वर्ष २०८२/८३ का लागि आयोजना गरिएको प्रदेशस्तरीय तारा अवार्ड कार्यक्रम समापन हुनेछ।

यसअघि नेपाल लाइफले सुदूरपश्चिम प्रदेशको कार्यक्रम धनगढीस्थित पौवा होटलमा आयोजना गरेको थियो। कार्यक्रममा १५८ जनाको सहभागिता रहेको थियो भने ६८ जना अभिकर्ता सम्मानित भएका थिए।

कार्यक्रममा नेपाल लाइफका प्रमुख कार्यकारी अधिकृत प्रविण रमण पराजुलीले पेशागत बीमा अभिकर्ता संघ नेपालसँग कम्पनीले दुई दशकदेखि विभिन्न विषयमा सल्लाह, छलफल र सहकार्य गर्दै आएको बताए। व्यक्तिभन्दा संस्थागत सहकार्यलाई प्राथमिकता दिँदै नेतृत्वमा जो आए पनि संघसँग समन्वय गरेर अघि बढ्ने उनले बताए।

कम्पनीका नेशनल सेल्स हेड उमापति पोख्रेलले कम्पनीले तय गरेको लक्ष्य पूरा गर्न सबै प्रदेशहरु सक्षम हुने विश्वास व्यक्त गरे। विगतमा कायम गरेको प्रदर्शनलाई यस वर्ष पनि निरन्तरता दिने अपेक्षा रहेको उनले बताए।

कार्यक्रममा पेशागत बीमा अभिकर्ता संघ नेपालका अध्यक्ष ओम केसीले बीमा ऐन, २०७९ कार्यान्वयनमा आएपछि अभिकर्ताका केही अधिकार तथा विषयमा परिवर्तन आएको बताए। नियमावलीमा सुधारका लागि संघले पहल गरिरहेको र छुटेका विषयलाई सम्बोधन गर्न कार्यदल गठन गर्न सफल भएको उनले जानकारी दिए। आगामी २०८४ मा बीमा ऐन संशोधनको अवसरमा बाँकी विषयलाई समेत सुधारका लागि पहल गरिने उनले बताए।

पेशागत बीमा अभिकर्ता संघ नेपाल बीमक समिति, नेपाल लाइफका अध्यक्ष गणेश अधिकारीले संगठनलाई थप व्यवस्थित र समावेशी बनाउँदै अभिकर्ता तथा बिमितको हितमा कम्पनीसँग सहकार्य अघि बढाइएको बताए। अभिकर्ताले सहज रूपमा काम गर्न सक्ने वातावरण निर्माणका लागि कम्पनीसँग निरन्तर छलफल र समन्वय भइरहेको उनले बताए।

अधिकारीले संगठन तथा कम्पनीसँग सम्बन्धित समस्या समाधानका लागि शाखा, प्रदेश र केन्द्रीय तहबाट क्रमशः पहल गरिने बताए। संगठन विस्तारसँगै देखिन सक्ने समस्यालाई संस्थागत संरचनामार्फत समाधान गरिने भन्दै उनले अभिकर्तालाई आफ्नो काममा निरन्तर लाग्न आग्रह गरे।

नेपाल लाइफले यसअघि कोशी, मधेस, लुम्बिनी र बागमती प्रदेशमा पनि तारा अवार्ड कार्यक्रम सम्पन्न गरिसकेको छ। कोशी प्रदेशको इटहरीस्थित होटल सोल्टीमा आयोजित कार्यक्रममा ४०४ जना अभिकर्ता सम्मानित भएका थिए भने करिब ५०० जनाको सहभागिता रहेको थियो।

मधेस प्रदेशको कार्यक्रममा ३६७ जना अभिकर्तासहित ४०० भन्दा बढीको सहभागिता रहेको थियो। लुम्बिनी प्रदेशमा आयोजित कार्यक्रममा करिब ४२५ जनाको सहभागिता हुँदा १७० जना अभिकर्ता सम्मानित भएका थिए।

त्यस्तै, बागमती ‘बी’ अन्तर्गत असोज ८ गते चितवनको नारायणगढस्थित लोर्ड्स सीबीसी प्लाजामा आयोजित कार्यक्रममा २२४ जनाको सहभागिता रहेको थियो भने ६२ जना अभिकर्ता सम्मानित भएका थिए। बागमती ‘ए’ अन्तर्गत असोज ११ गते सम्पन्न कार्यक्रममा ८५० जनाको सहभागिता रहेको थियो भने २७० जना अभिकर्तालाई तारा अवार्ड प्रदान गरिएको कम्पनीले जनाएको छ।

नेपाल लाइफले विभिन्न प्रदेशमा कार्यरत अभिकर्ताको कार्यसम्पादन र सहभागिताका आधारमा तारा अवार्ड प्रदान गर्दै आएको छ। गण्डकी प्रदेशको कार्यक्रमसँगै आर्थिक वर्ष २०८२/८३ को प्रदेशस्तरीय तारा अवार्ड कार्यक्रम औपचारिक रूपमा समापन हुनेछ।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

नेशनल लाइफको २० प्रतिशत लाभांश घोषणा

लेखापरीक्षण प्रतिवेदन नबुझाउने विभिन्न बीमा कम्पनीहरूलाई जरीवाना