नामिबियासँग नेपाल २० रनले पराजित

BFIS News
2024 Feb 27 15:06

काठमाडौं । त्रिकोणात्मक टी-२० आई सिरिजको पहिलो खेलमा नामिबियासँग नेपाल २० रनले पराजित भएको छ । त्रिवि क्रिकेट मैदान कीर्तिपुरमा जितका लागि २०७ रनको लक्ष्य पछ्याएको नेपाल १८.५ ओभरमा १८६ रनमा अल आउट भयो ।

नेपालका लागि दिपेन्द्र सिंह ऐरीले सर्वाधिक ४८ रन बनाउँदा कप्तान रोहित पौडेलले ४२ रन बनाए। यस्तै कुशल मल्लले ३२ तथा सोमपाल कामीले २६ रन बनाए। नेपालका ओपनर आज चल्न सकेनन्। कुशल भुर्तेल रन नबनाइ आउट हुँदा आसिफ शेख ६ रन बनाएर आउट भए। गुलशन झाले १२ रन बनाउँदा सन्दिप जोरा ५ र विवेक यादव ६ रनमा आउट भए। नामिबियाका रुबेन ट्रम्पलम्यानले ४ विकेट लिए।

टस जितेर पहिले ब्याटिङ गरेको नामिबियाले लोफ्टि इटनको विष्फोटक शतकीय पारीमा २० ओभरमा ४ विकेट गुमाउँदै २०६ रन बनाएको थियो। उनले टी-२० अन्तर्राष्ट्रियमा सर्वाधिक छिटो शतक प्रहार गर्ने कुशल मल्लको नाममा रहेको किर्तिमानी तोडे। उनले ३३ बलमा शतक प्रहार गरे। यसअघि ३४ बलमा शतकको किर्तिमानी मल्लको नाममा थियो। उनले कुल १०१ रन बनाए। यस्तै मलन क्रुगरले ५९ रन बनाए।