पत्रकार र सञ्चारकर्मी अब सामाजिक सुरक्षा दायरामा

BFIS News
2025 Nov 27 19:20

पत्रकार र सञ्चारकर्मी अब सामाजिक सुरक्षा दायरामा

काठमाडौँ, बिहीवार — देशभरका पत्रकार, सञ्चारकर्मी तथा सरकारी सञ्चार संस्थाका कर्मचारीहरू अबदेखि औपचारिक रूपमा सामाजिक सुरक्षाको दायरामा प्रवेश गर्ने भएका छन्। सिंहदरबारमा आयोजना गरिएको विशेष कार्यक्रममा यस सम्बन्धमा जानकारी दिइएको हो।

कार्यक्रममा बोल्दै सञ्चार तथा सूचना प्रविधिमन्त्री जगदीश खरेलले सञ्चार मन्त्रालय मातहतका प्रमुख सञ्चार संस्थाहरू—गोरखापत्र संस्था, राष्ट्रिय समाचार समिति (रासस), सार्वजनिक सेवा प्रसारण (पीएसपी) अन्तर्गतका रेडियो नेपाल र नेपाल टेलिभिजन, साथै प्रेस काउन्सिल नेपाल र न्युनतम पारिश्रमिक निर्धारण समितिलाई सामाजिक सुरक्षामा जोड्ने प्रक्रिया थालिएको बताए।

मन्त्री खरेलका अनुसार अब ती निकायअन्तर्गत कार्यरत पत्रकार, सञ्चारकर्मी तथा कर्मचारीहरू सामाजिक सुरक्षाको औपचारिक सुरक्षात्मक छातामुनि प्रवेश गर्नेछन्। उनले निकट भविष्यमा सबै सञ्चारकर्मीलाई प्रणालीगत रूपमा सामाजिक सुरक्षामा समावेश गर्ने विस्तृत कार्ययोजना कार्यान्वयन गरिने स्पष्ट पारे।
उनका अनुसार पत्रकारको पेशागत सुरक्षासँगै आर्थिक तथा सामाजिक सुरक्षालाई सरकारले प्राथमिक एजेन्डाका रूपमा अघि सारेकाले यो कदम महत्वपूर्ण उपलब्धि हो।

मन्त्री खरेलले भने, “आठौँ सामाजिक सुरक्षा दिवसको अवसरमा सञ्चार मन्त्रालयका मातहतका निकायहरू—गोरखापत्र संस्था, रासस, सार्वजनिक सेवा प्रसारण अन्तर्गतको रेडियो नेपाल, नेपाल टेलिभिजन, प्रेस काउन्सिल र न्युनतम पारिश्रमिक निर्धारण समिति—यी सबै संस्थामा आजबाट सामाजिक सुरक्षामा आवद्ध गराउने कामको शुरुवात गरिएको छ। सामाजिक सुरक्षा कोष र यी निकायहरूबीच आज समझदारीपत्रमा हस्ताक्षर भएको छ। अब यी निकायहरूअन्तर्गत रहेका सबै पत्रकार, सञ्चारकर्मी र कर्मचारी सामाजिक सुरक्षाको दायरामा आउनेछन्। यो सुरुवात मात्र हो, यसपछि थप कामहरू क्रमशः अगाडि बढ्नेछन्।”

खरेलले निजी सञ्चार माध्यमहरूलाई पनि सामाजिक सुरक्षाको दायरामा जोडिन आग्रह गर्दै यसले समग्र सञ्चार क्षेत्रको पेशागत र सामाजिक सुरक्षामा नयाँ मापदण्ड स्थापित गर्ने विश्वास व्यक्त गरे।