नेपाल राष्ट्र बैंकले पुनः २५ अर्ब रुपैयाँ तरलता झिक्ने

काठमाडौं । नेपाल राष्ट्र बैंकले बजारमा रहेको अधिक तरलता व्यवस्थापन गर्न आज पुनः २५ अर्ब रुपैयाँ झिक्ने भएको छ। केन्द्रीय बैंकले ‘नेपाल राष्ट्र बैंक ऋणपत्र २०८३ ग’ मार्फत एक वर्षका लागि उक्त रकम बजारबाट तान्न लागेको हो।

करिब १० वर्षको अन्तरालपछि गत सातादेखि ऋणपत्र जारी गर्न थालेको राष्ट्र बैंकले यसै साताभित्र तेस्रो पटक यो उपकरण प्रयोग गर्न लागेको हो। यसअघि गत सोमबार र बुधबार पनि बैंकले २५/२५ अर्ब रुपैयाँका दरले बजारबाट रकम झिकेको थियो।

राष्ट्र बैंकका अनुसार उक्त ऋणपत्रको बोलकबोल आज (पुस २० गते) दिउँसो २ बजे हुनेछ। ऋणपत्रको परिपक्व अवधि एक वर्षको रहनेछ भने साँवा भुक्तानी २०८३ पुस २० गते हुनेछ। ब्याजदर बोलकबोल प्रक्रियामार्फत निर्धारण गरिनेछ र ब्याज भुक्तानी प्रत्येक ६/६ महिनामा गरिने व्यवस्था गरिएको छ।

लगानीकर्ताले न्यूनतम ५ करोड रुपैयाँ र बढीमा ५ करोडले निःशेष भाग जाने गरी (५ करोडको गुणाङ्कमा) आवेदन दिन सक्नेछन्। यस ऋणपत्रमा नेपाल राष्ट्र बैंकबाट अनुमति प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाहरूले मात्र सहभागिता जनाउन पाउनेछन्।

खरिद गरिएको ऋणपत्रलाई बैंक तथा वित्तीय संस्थाहरूले अन्य बैंक वा स्वयं राष्ट्र बैंकमा धितो राखी कर्जा लिन समेत प्रयोग गर्न सक्नेछन्।

बजारमा लगानीयोग्य रकम अत्यधिक थुप्रिएपछि ब्याजदर सन्तुलनमा राख्न र तरलता व्यवस्थापन गर्न केन्द्रीय बैंकले पछिल्लो समय आक्रामक रूपमा यस्ता मौद्रिक उपकरणमार्फत बजारबाट पैसा झिक्दै आएको छ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?