केवल १३ सूचीकृत कम्पनीले मात्रै गरे लाभांश घोषणा, ४० म्युचुअल फण्डले वितरण गरे लाभांश

काठमाडौं, असोज ७ — आर्थिक वर्ष २०८०/८१ सकिएको दुई महिना बितिसक्दा पनि हालसम्म जम्मा १३ वटा सूचीकृत कम्पनीले मात्र लाभांश घोषणा गरेका छन्। कम्पनीको लेखापरीक्षण प्रक्रिया प्रभावित भएपछि लाभांश घोषणा ढिलाइ भएको हो।

भदौ २३ र २४ गते जेनजी आन्दोलनका कारण लेखापरीक्षण कार्य प्रभावित हुँदा धेरै कम्पनीहरूले समयमै लाभांश घोषणा गर्न सकेका छैनन्। नेपाल राष्ट्र बैंकले बैंकहरूलाई साउन महिनासम्मको कारोबार समायोजन गर्ने सुविधा दिएसँगै वित्तीय विवरण तयार पार्न ढिलाइ भएको र त्यसले लेखापरीक्षणमा समेत असर पारेको देखिएको छ।

लाभांश घोषणा गर्ने मुख्य कम्पनीहरू

अहिलेसम्म सानिमा, एभरेष्ट र माछापुच्छ्रे गरी तीन वटै मात्र वाणिज्य बैंकहरूले लाभांश घोषणा गरेका छन्। सानिमा बैंकले ७.३६ प्रतिशत नगद लाभांश, एभरेष्ट बैंकले ६ प्रतिशत बोनस सेयर र १४ प्रतिशत नगद लाभांश सहित कुल २० प्रतिशत घोषणा गरेको छ।

विकास बैंकतर्फ मुक्तिनाथ विकास बैंकले १८.२ प्रतिशत र कामना सेवा विकास बैंकले १५.७८ प्रतिशत लाभांश घोषणा गरेका छन्। अन्य कम्पनीहरूमा हाथवे इन्भेष्टमेन्टले १२ प्रतिशत बोनस सेयर र नेपाल ल्युव आयलले २० प्रतिशत बोनस सेयर दिने भएका छन्।  

जलविद्युत् समूहतर्फ हालसम्म ५ वटा कम्पनीले मात्र लाभांश घोषणा गरेका छन्। तीमध्ये हिल्टन हाइड्रोपावर बाहेक सबैले बोनस सेयर दिने घोषणा गरेका छन्।

बीमा कम्पनीहरूले भने हालसम्म लाभांश घोषणा गर्न सकेका छैनन्। एक्चुरियल मूल्याङ्कनको प्रक्रिया सकिन बाँकी रहेकाले कतिपय कम्पनीले माघमा, बाँकीले चैत वा बैशाखसम्ममा मात्र लाभांश वितरण गर्ने अवस्था देखिएको छ।

म्युचुअल फण्डको सक्रियता

यस वर्ष ४० वटा म्युचुअल फण्डहरूले लाभांश घोषणा गरिसकेका छन् र लगानीकर्ताहरूको खातामा रकम पठाइसकेका छन्। म्युचुअल फण्डको औसत लाभांश दर १२.२८% रहेको छ, जुन हालको बैंक ब्याजदरको तुलनामा बढी हो।

लघुवित्त वित्तीय संस्थाहरूले हालसम्म लाभांश घोषणा गर्न सकेका छैनन्। यद्यपि, राष्ट्र बैंकले लघुवित्त कम्पनीहरूका लागि छुट्टै लाभांशसम्बन्धी निर्देशिका बनाइसकेको छ, जसअनुसार लाभांश घोषणा सम्भव छ। तर प्रारम्भिक वित्तीय विवरणहरू हेर्दा अधिकांश लघुवित्तले लाभांश दिन सक्ने अवस्था देखिँदैन।

बाणिज्य बैंकमध्ये करिब १० वटा बैंकले राम्रो लाभांश दिन सक्ने अनुमान गरिएको छ, तर फाइनान्स र विकास बैंकहरूको अवस्था भने कमजोर देखिएको छ। बीमा ऐन र कम्पनी ऐन अनुसार अबको तीन महिनासम्म कम्पनीहरूले लेखापरीक्षण सकाएर साधारणसभा गर्दै लाभांश घोषणा गर्ने सम्भावना छ।

जलविद्युत कम्पनीहरू अझै पनि हकप्रद सेयर निष्कासनमै सक्रिय रहेका छन्। लाभांश घोषणाको क्रम सुरु भए पनि लगानीकर्ताहरूले ठूलो लाभांशको आश गर्न अझै केही वर्ष कुर्नुपर्ने देखिन्छ।

शेयर बजारमा लाभांश वितरणको गति सुस्त देखिए पनि म्युचुअल फण्डहरू तुलनात्मक रूपमा सक्रिय देखिएका छन्। बीमा, लघुवित्त तथा जलविद्युत कम्पनीहरूमा लाभांशको लागि अझै प्रतीक्षा गर्नुपर्नेछ। आगामी तीन महिना लाभांश घोषणाको दृष्टिले निर्णायक बन्ने अपेक्षा गर्न सकिन्छ।

प्रतिक्रिया दिनुहोस्

सम्बन्धित समाचार

सेयर किन्नुअघि कसरी गर्ने रिसर्च ? यी हुन् महत्वपूर्ण ५ चरणहरु

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?