बीमा प्राधिकरण कोशी प्रदेशद्धारा शहिदभूमी गाउँपालिकामा बीमा सम्बन्धी छलफल तथा अन्तर्क्रिया सम्पन्न

धनकुटा । नेपाल बीमा प्राधिकरण कोशी प्रदेशको आयोजनामा धनकुटा जिल्लाको शहिदभूमी गाउँपालिकामा बीमा सम्बन्धी छलफल तथा अन्तरक्रिया कार्यक्रम सम्पन्न भएको छ। स्थानीय तहमा बीमाको पहुँच, दाबी प्रक्रिया, अनुदान व्यवस्था तथा विद्यमान चुनौतीहरूबारे सहभागीहरूसँग विस्तृत छलफल गरिएको कार्यक्रममा स्थानीय जनप्रतिनिधि, कर्मचारी, बीमक, अभिकर्ता तथा सर्वसाधारणको उल्लेखनीय सहभागिता थियो।

कार्यक्रममा नेपाल बीमा प्राधिकरण कोशी प्रदेश कार्यालयका सहायक निर्देशक सचिन राईले बीमासम्बन्धी विभिन्न विषयमा प्रस्तुतीकरण राख्दै बीमा अभ्यासलाई पारदर्शी, सुरक्षित र सर्वसुलभ बनाउनुपर्ने आवश्यकता औंल्याए। अन्तरक्रियाका क्रममा सहभागीहरूले सरकारी भवनको बीमाको आधार र दर, अभिकर्तामार्फत हुनसक्ने ठगीका सम्भावना, पशु बीमामा औषधि वितरणका प्रदेशगत भिन्नता, तेस्रो पक्ष मोटर बीमाको दाबी चरणबद्ध भुक्तानीजस्ता व्यावहारिक प्रश्नहरू उठाएका थिए।

कार्यक्रमका प्रमुख अतिथि तथा शहिदभूमी गाउँपालिका अध्यक्ष मनोज राईले कृषक तथा सर्वसाधारणसम्म बीमा सम्बन्धी जानकारी पुर्‍याउन स्थानीय तह सक्रिय हुनुपर्ने बताए। उनले बाली, पशु तथा भवनसहित सबै संरचनाको बीमा सम्भव भएकाले यसको आवश्यकताबारे जनस्तरमा व्यापक प्रचार–प्रसार गर्नुपर्ने धारणा राखे। गाउँपालिका उपाध्यक्ष रत्नश्वरीं राईले बीमासम्बन्धी सचेतनामूलक कार्यक्रमले समुदायमा सकारात्मक प्रभाव पार्ने बताउँदै मानिससँगै पशु, बाली र भौतिक संरचनाको बीमा गर्न आग्रह गरिन्।

गाउँपालिकाका प्रमुख प्रशासकीय अधिकृत सूर्यबहादुर भण्डारीले बीमा प्रक्रिया तथा पहुँचसम्बन्धी विस्तृत जानकारी छोटो समयमै प्राप्त हुँदा स्थानीय तहमा यसको प्रभावकारी कार्यान्वयनमा सहयोग पुग्ने विश्वास व्यक्त गरे।

नेपाल बीमा प्राधिकरण कोशी प्रदेश प्रमुख प्रिती देवले लाइसेन्स प्राप्त कम्पनी तथा अधिकृत व्यक्तिमार्फत मात्र सेवा लिन सहभागीहरूलाई अनुरोध गर्दै दाबी दर्ताका समयमा घटनाको यथार्थ विवरण दिनु अनिवार्य रहेको स्पष्ट पारिन्। उनले बीमासम्बन्धी उजुरी अनलाइनमार्फत प्राधिकरणमा दिन सकिने बताइन्। कृषिमा सरकारले ५० देखि ८० प्रतिशतसम्म अनुदान उपलब्ध गराउने जानकारी दिंदै सिफारिसप्रति शंका लागेमा प्राधिकरणसँग प्रत्यक्ष समन्वय गर्न सकिने उल्लेख गरिन्। निजीर्वन बीमामा क्षति मूल्याङ्कनको प्रक्रियामा केही समय लाग्ने भएकाले धैर्य राख्न पनि आग्रह गरिन्।

कार्यक्रममा सहिदभूमी गाउँपालिकाका कर्मचारी, बीमक, बीमा अभिकर्ता तथा स्थानीयको सक्रिय सहभागिता रहेको थियो। कार्यक्रमको सञ्चालन मिलन पोखरेलले गरेका थिए।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

नेशनल लाइफको २० प्रतिशत लाभांश घोषणा

लेखापरीक्षण प्रतिवेदन नबुझाउने विभिन्न बीमा कम्पनीहरूलाई जरीवाना