![$adHeader[0]['title']](https://www.bfisnews.com/images/bigyapan/1759825227_1100x100.gif)
अविरल वर्षा तथा बाढी–पहिरोबाट ३ अर्ब ७७ करोडभन्दा बढी दाबी, हालसम्म १ करोड १४ लाख भुक्तानी
- BFIS News
- 2025 Nov 27 18:02
काठमाडौँ। देशभर २०८२ असोज १८ गतेयताको अविरल वर्षा तथा बाढी–पहिरो लगायतका विपद्ले पारेको क्षतिको प्रारम्भिक बीमा दाबीमध्ये हालसम्म करिब १ करोड १४ लाख रुपैयाँ मात्र बीमिकर्तालाई भुक्तानी भएको नेपाल बीमा प्राधिकरणले जनाएको छ।
प्राधिकरणका कार्यकारी निर्देशक सुशिल देव सुवेदीका अनुसार हालसम्म दर्ता भएको ७४४ वटा प्रारम्भिक बीमा दाबीबाट कूल करिब ३ अर्ब ७७ करोड ४२ लाख रुपैयाँ बराबरको क्षति मूल्यांकन भएको छ।
प्राधिकरणमा आएका १३ वटा निर्जीवन बीमा कम्पनी र २ वटा लघु निर्जीवन बीमा कम्पनीबाट प्राप्त अद्यावधिक तथ्यांक अनुसार, विभिन्न बीमा वर्गमा भुक्तानीको स्थिति यस्तो छ—
सम्पत्ति बीमा
सम्पत्ति बीमा तर्फ दर्ता भएका ४०५ वटा दाबीमध्ये करिब ३ अर्ब २१ करोड ५० लाख रुपैयाँ क्षति दाबी भएको छ। यसमध्ये करिब ६४ लाख रुपैयाँ मात्रै बीमितलाई भुक्तानी गरिएको प्राधिकरणले जनाएको छ।
इन्जिनियरिङ तथा ठेक्का जोखिम बीमा
यस समूहमा १०४ वटा दाबी दर्ता भई करिब ४७ करोड ६६ लाख रुपैयाँ दाबी रकम मागिएको छ। जसमध्ये करिब १ लाख ५४ हजार रुपैयाँ मात्र भुक्तानी भएको छ।
कृषि तथा बाली बीमा
कृषि तथा बाली बीमा अन्तर्गत २१० वटा दाबी दर्ता भएको र करिब ४ करोड १४ लाख रुपैयाँ बराबरको क्षति मूल्यांकन भएको छ। अहिलेसम्म करिब १ लाख रुपैयाँ मात्रै भुक्तानी भएको प्राधिकरणले जनाएको छ।
मोटर बीमा (निजी)
मोटर बीमा निजी सवारी तर्फ ४० वटा दाबी प्राप्त भई करिब २ करोड ८२ लाख रुपैयाँ दाबी रकममध्ये करिब ४८ लाख रुपैयाँ बीमितलाई उपलब्ध गराइएको छ।
मोटर बीमा (सार्वजनिक), अन्य तथा सामुद्रिक बीमा
सार्वजनिक सवारी साधन बीमा तर्फका १० वटा दाबी (करिब १ करोड ८ लाख), अन्य बीमा तर्फका २ वटा दाबी (करिब १२ लाख) र सामुद्रिक बीमा तर्फका ३ वटा दाबी (करिब १० लाख) को भुक्तानी प्रक्रिया भने अझै सुरु नभएको प्राधिकरणले जनाएको छ।
प्राधिकरणका अनुसार अभिलेख संकलन, क्षति मूल्यांकन तथा प्रमाणीकरणको प्रक्रिया जारी रहेकाले दाबी भुक्तानी क्रमशः अघि बढाइने छ।
शेयर गर्नुहोस
प्रतिक्रिया दिनुहोस्
सम्बन्धित समाचार
प्रतिक्रिया