सामुदायिक वनमा ७ लाखभन्दा बढी रकम हिनामिना आरोप, तीन पदाधिकारीविरुद्ध अख्तियारको भ्रष्टाचार मुद्दा

काठमाडौं । Commission for the Investigation of Abuse of Authority ले सुर्खेतको भेरीगंगा नगरपालिका–१३ स्थित साजगोठेरी सामुदायिक वन उपभोक्ता समितिमा आर्थिक अनियमितता गरेको आरोपमा तत्कालीन अध्यक्ष, सचिव र कोषाध्यक्षविरुद्ध भ्रष्टाचार मुद्दा दायर गरेको छ।

अख्तियारको अनुसन्धानबाट सामुदायिक वनको काठ बिक्री, चिरानी खर्च, वनहेरालुको तलब, घरभाडा तथा अन्य शीर्षकमा झुट्टा विवरण तयार गरी कुल ७ लाख १५ हजार ९१६ रुपैयाँ हिनामिना गरिएको निष्कर्ष निकालिएको छ। सोही आधारमा विशेष अदालत काठमाडौंमा आरोपपत्र दायर गरिएको हो।

मुद्दा दायर गरिएका व्यक्तिमा तत्कालीन अध्यक्ष लोकबहादुर महतारा, सचिव मानकुमारी पौड्याल र कोषाध्यक्ष दलबहादुर बुढा रहेका छन्। आयोगका अनुसार उनीहरूले आपसी मिलेमतोमा सामुदायिक वनको रकम दुरुपयोग गरेको आरोप लगाइएको छ।

अनुसन्धानका क्रममा आर्थिक वर्ष २०७७/७८ मा कटान अनुमति लिई आर्थिक वर्ष २०७८/७९ मा चिरान गरिएको काठ बिक्रीबाट प्राप्त हुनुपर्ने रकमभन्दा ९५ हजार ११८ रुपैयाँ कम आम्दानी देखाएर रकम हिनामिना गरिएको पाइएको छ।

त्यसैगरी काठ चिरानी खर्च वास्तविकभन्दा बढी देखाइएको आयोगले जनाएको छ। लेखापरीक्षण प्रतिवेदनमा ४ लाख ४० हजार रुपैयाँ खर्च भएको उल्लेख गरिए पनि वास्तविक खर्चको तुलनामा ३ लाख ६६ हजार ९१६ रुपैयाँ बढी खर्च देखाइएको निष्कर्ष निकालिएको छ।

यस्तै दुई आर्थिक वर्षमा वनहेरालुलाई २ लाख २० हजार रुपैयाँ भुक्तानी गरिएको विवरण पेश गरिएको थियो। तर अनुसन्धानका क्रममा वनहेरालुले वास्तविक रूपमा १ लाख ३० हजार रुपैयाँ मात्र प्राप्त गरेको भेटिएपछि ९० हजार रुपैयाँ बराबरको झुट्टा भरपाई तयार गरिएको पुष्टि भएको आयोगको दाबी छ।

अख्तियारका अनुसार सामुदायिक वनको विधान संशोधनका लागि काठमाडौं जाँदा तत्कालीन अध्यक्ष महताराले १ लाख २० हजार रुपैयाँ लिएको देखिए पनि उक्त रकमको खर्च विवरण वा प्रमाण पेश गर्न सकेका छैनन्।

त्यसैगरी लेखापरीक्षण प्रतिवेदनमा घरभाडा वापत ५२ हजार रुपैयाँ खर्च भएको उल्लेख गरिएकोमा घरधनीले हालसम्म ८ हजार रुपैयाँ मात्र प्राप्त गरेको बयान दिएका छन्। बाँकी ४४ हजार रुपैयाँका लागि झुट्टा बिल तथा भरपाई तयार गरिएको आयोगको आरोप छ।

आयोगले तीनै जनाविरुद्ध भ्रष्टाचार निवारण ऐन, २०५९ अन्तर्गत मुद्दा दायर गर्दै हिनामिना भएको रकम बराबरको बिगो असुल, सोही बराबर जरिवाना तथा कैद सजायको माग गरेको छ।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

७० औं अन्तर्राष्ट्रिय भन्सार दिबसमा के एल दुगड समुहका श्याम सुन्दर कनोडिया सम्मानित

राजश्व राष्ट्रको रगत पसिना भएकोले बगेर गएको टुलुटुलु हेरेर बस्न सकिदैन : अर्थमन्त्री शर्मा