![$adHeader[0]['title']](https://www.bfisnews.com/images/bigyapan/1774272772_1769061114-ss-nimb.gif)
महालक्ष्मी विकास बैंकको नाफा ४८ प्रतिशतले बढ्यो, वितरणयोग्य प्रतिशेयर आम्दानी १०.३१ रुपैयाँ
- BFIS News
- 2026 Aug 05 11:14
काठमाडौं । महालक्ष्मी विकास बैंक लिमिटेडले आर्थिक वर्ष २०८२/८३ को चौथो त्रैमाससम्मको अपरिष्कृत वित्तीय विवरण सार्वजनिक गर्दै नाफा, खुद ब्याज आम्दानी तथा प्रतिशेयर आम्दानीमा उल्लेखनीय सुधार भएको जनाएको छ। वित्तीय विवरणअनुसार बैंकले सञ्चालन आम्दानीमा वृद्धि गर्दै नाफा बढाएको छ भने इम्पेयरमेन्ट चार्जमा उल्लेख्य कमी आएको देखिएको छ।
समीक्षा अवधिमा बैंकको खुद नाफा ४८.४० प्रतिशतले वृद्धि भई ६२ करोड ९९ लाख रुपैयाँ पुगेको छ। अघिल्लो आर्थिक वर्षको सोही अवधिमा बैंकले ४२ करोड ४३ लाख रुपैयाँ खुद नाफा आर्जन गरेको थियो।
बैंकको मुख्य आम्दानी स्रोतका रूपमा रहेको खुद ब्याज आम्दानी पनि बढेको छ। अघिल्लो आर्थिक वर्षको १ अर्ब ९४ करोड रुपैयाँ रहेको खुद ब्याज आम्दानी समीक्षा अवधिमा १०.६९ प्रतिशतले वृद्धि भएर २ अर्ब १४ करोड रुपैयाँ पुगेको छ। त्यस्तै, सञ्चालन नाफा ६१ करोड १४ लाख रुपैयाँबाट ५३.४१ प्रतिशतले बढ्दै ९३ करोड ७९ लाख रुपैयाँ पुगेको छ।
यस अवधिमा बैंकले सम्भावित कर्जा जोखिम व्यवस्थापनका लागि इम्पेयरमेन्ट चार्जबापत ३१ करोड ५६ लाख रुपैयाँ व्यवस्था गरेको छ। अघिल्लो आर्थिक वर्षको सोही अवधिमा यस्तो व्यवस्था ५१ करोड ७३ लाख रुपैयाँ रहेको थियो। इम्पेयरमेन्ट चार्जमा आएको कमीले पनि बैंकको नाफा वृद्धिमा सकारात्मक योगदान पुगेको देखिन्छ।
नियामकीय समायोजनपछि बैंकको खुद वितरणयोग्य नाफा ४६ करोड ५१ लाख ४४ हजार रुपैयाँ कायम भएको छ। अघिल्लो आर्थिक वर्षको सञ्चित नाफाबाट बोनस शेयर तथा नगद लाभांश वितरणको समायोजनपछि कुल वितरणयोग्य नाफा ४६ करोड ५१ लाख ९८ हजार रुपैयाँ पुगेको छ। यसअनुसार बैंकको प्रतिशेयर वितरणयोग्य नाफा १० रुपैयाँ ३१ पैसा रहेको छ।
समीक्षा अवधिसम्म बैंकको चुक्ता पूँजी ४ अर्ब ५१ करोड १२ लाख रुपैयाँ पुगेको छ। सञ्चित नाफा तथा अन्य जगेडा कोषसहित कुल इक्विटी ७ अर्ब ४६ करोड २६ लाख रुपैयाँ रहेको वित्तीय विवरणमा उल्लेख छ।
व्यवसाय विस्तारतर्फ पनि बैंकले प्रगति गरेको देखिएको छ। असार मसान्तसम्म बैंकले ५५ अर्ब ९९ करोड रुपैयाँ निक्षेप सङ्कलन गरेको छ भने ४३ अर्ब ३४ करोड १३ लाख रुपैयाँ कर्जा प्रवाह गरेको छ। यस अवधिमा बैंकको कुल सम्पत्ति ६५ अर्ब ५ करोड ७० लाख रुपैयाँ पुगेको छ।
वित्तीय सूचकहरूमा देखिएको सुधार, सञ्चालन नाफामा भएको उल्लेखनीय वृद्धि तथा इम्पेयरमेन्ट चार्जमा आएको कमीले महालक्ष्मी विकास बैंकले आर्थिक वर्ष २०८२/८३ मा आफ्नो वित्तीय अवस्था थप सुदृढ बनाएको संकेत गरेको छ।
शेयर गर्नुहोस
प्रतिक्रिया दिनुहोस्
सम्बन्धित समाचार
प्रतिक्रिया