![$adHeader[0]['title']](https://www.bfisnews.com/images/bigyapan/1726536208_1712932632_Onlinearthik_1200x100.gif)
बेनी हाइड्रोपावरको आईपीओमा पहिलो दिनमै माग भन्दा १३ गुणा बढी आवेदन, ९ लाख ५७ हजारले भरे
- BFIS News
- 2026 Sep 08 13:46
 (3) (1).gif)
काठमाडौं । बेनी हाइड्रोपावर प्रोजेक्ट लिमिटेडको प्राथमिक सार्वजनिक निष्कासन (आईपीओ) मा सर्वसाधारणको उत्साहजनक सहभागिता देखिएको छ। कम्पनीको आईपीओमा हालसम्म ९ लाख ५७ हजार ३६८ जना आवेदकले १ करोड १२ लाख २४ हजार ९७० कित्ता शेयरका लागि आवेदन दिएका छन्।
कम्पनीले सर्वसाधारणका लागि ८ लाख ६३ हजार २०० कित्ता शेयर निष्कासन गरेकोमा मागभन्दा करिब १३ गुणा बढी कित्ताका लागि आवेदन परेको हो। प्रतिकित्ता १०० रुपैयाँका दरले हेर्दा आवेदन रकम १ अर्ब १२ करोड २४ लाख ९७ हजार रुपैयाँ पुगेको छ।
बेनी हाइड्रोपावरले भदौ २२ गतेदेखि सर्वसाधारणका लागि आईपीओ निष्कासन गरेको हो। प्रारम्भिक रूपमा भदौ २५ गतेसम्म आवेदन दिन सकिने व्यवस्था गरिएको छ। सो अवधिमा मागअनुसार आवेदन नपरेमा निष्कासन अवधि असोज ५ गतेसम्म थप गर्न सकिनेछ।
कम्पनीले प्रतिकित्ता १०० रुपैयाँ अंकित मूल्यमा कुल ८ लाख ६३ हजार २०० कित्ता साधारण शेयर निष्कासन गरेको हो। लगानीकर्ताले न्यूनतम १० कित्तादेखि अधिकतम १० हजार कित्तासम्म आवेदन दिन सक्नेछन्।
विभिन्न समूहका लागि शेयर छुट्याइएको
बेनी हाइड्रोपावरको जारी पुँजी १ अर्ब ४ करोड रुपैयाँ रहेको छ। जारी पुँजीको २० प्रतिशत अर्थात् २० लाख ८० हजार कित्ता शेयर सर्वसाधारण समूहका लागि छुट्याइएको थियो।
त्यसमध्ये १० लाख ४० हजार कित्ता शेयर आयोजना प्रभावित स्थानीय बासिन्दाका लागि छुट्याइएको छ। त्यस्तै, सर्वसाधारणका लागि छुट्याइएको अर्को १० लाख ४० हजार कित्तामध्ये १ लाख ४ हजार कित्ता वैदेशिक रोजगारीमा रहेका नेपाली नागरिकका लागि यसअघि नै निष्कासन गरिएको थियो।
सर्वसाधारणतर्फको निष्कासनमा कम्पनीका कर्मचारीका लागि २० हजार ८०० कित्ता र सामूहिक लगानी कोषका लागि ५२ हजार कित्ता शेयर सुरक्षित गरिएको छ। यी कोटा छुट्याएपछि बाँकी रहेको ८ लाख ६३ हजार २०० कित्ता शेयर सर्वसाधारणका लागि खुला गरिएको हो। आईपीओ निष्कासन तथा बिक्री प्रबन्धकको जिम्मेवारी एनएमबी क्यापिटल लिमिटेडले पाएको छ।
इक्रा नेपालको रेटिङ पनि सुधार
यसैबीच, इक्रा नेपालले बेनी हाइड्रोपावर प्रोजेक्ट लिमिटेडको इश्युअर रेटिङ सुधार गरेको छ। यसअघि [ICRANP-IR] BB रहेको कम्पनीको रेटिङ बढाएर [ICRANP-IR] BB+ कायम गरिएको हो। उक्त रेटिङले वित्तीय दायित्व समयमै पूरा गर्ने सम्बन्धमा कम्पनीमा मध्यम स्तरको जोखिम रहेको संकेत गर्छ।
१८ मेगावाटको आयोजना निर्माणाधीन
बेनी हाइड्रोपावर सन् २०१६ मा स्थापना भएको जलविद्युत् विकास कम्पनी हो। कम्पनीले सोलुखुम्बु जिल्लाको बेनी (सल्लेरी) क्षेत्रमा १८ मेगावाट क्षमताको अपर सोलु खोला जलविद्युत् आयोजना निर्माण गरिरहेको छ।
रन–अफ–द–रिभर प्रकृतिको उक्त आयोजना हाल निर्माणाधीन अवस्थामा रहेको छ। कम्पनीले आईपीओबाट संकलन हुने पुँजीलाई आयोजना निर्माण तथा वित्तीय संरचनासँग सम्बन्धित आवश्यकतामा उपयोग गर्ने अपेक्षा गरिएको छ।
सर्वसाधारणका लागि आईपीओ निष्कासनसँगै कम्पनीको शेयर स्वामित्व संरचनामा सर्वसाधारण लगानीकर्ताको सहभागिता थप विस्तार हुने भएको छ।
शेयर गर्नुहोस
प्रतिक्रिया दिनुहोस्
सम्बन्धित समाचार
प्रतिक्रिया