बीमाशुल्क २६ प्रतिशत बढ्दा रिलायबल नेपाल लाइफको जीवन बीमा कोष १९ अर्ब नाघ्यो, लगानीमा ३१ प्रतिशत वृद्धि

काठमाडौं। रिलायबल नेपाल लाइफ इन्स्योरेन्स कम्पनी लिमिटेडको बीमाशुल्क आर्जन र कुल आम्दानीमा उल्लेख्य वृद्धि भए पनि चालु आर्थिक वर्ष २०८३/८४ को पहिलो त्रैमासमा नाफा वृद्धिदर भने कम देखिएको छ। बैंकको व्याजदर घट्दा कम्पनीको मुनाफामा दवाव परेको हो। 

कम्पनीको अपरिष्कृत वित्तीय विवरणअनुसार समीक्षा अवधिमा कुल आम्दानी ३९.८६ प्रतिशत बढेर २ अर्ब ३३ करोड रुपैयाँ पुगेको छ। गत आर्थिक वर्षको सोही अवधिमा कम्पनीले १ अर्ब ६७ करोड रुपैयाँ कुल आम्दानी गरेको थियो। तर, कुल खर्च आम्दानीभन्दा उच्च अर्थात् ४५.९० प्रतिशत बढेर २ अर्ब ९ करोड ९७ लाख रुपैयाँ पुगेको छ। गत वर्ष यस्तो खर्च १ अर्ब ४३ करोड ९१ लाख रुपैयाँ थियो।

आम्दानीभन्दा खर्चको वृद्धिदर उच्च भएपछि कम्पनीको करअघिको नाफा ४.०४ प्रतिशत मात्रै बढेको छ। समीक्षा अवधिमा कम्पनीले २४ करोड ४९ लाख रुपैयाँ करअघिको नाफा आर्जन गरेको छ। गत आर्थिक वर्षको पहिलो त्रैमासमा यस्तो नाफा २४ करोड ४७ लाख रुपैयाँ थियो। कर पछिको खुद मुनाफा भने २२ करोड ९० लाख रुपैयाँ रहेको छ। गत वर्षको यहि अवधिमा २५ करोड ८५ लाख रुपैयाँ थियो। 

बीमाशुल्क आर्जनमा २६ प्रतिशतको वृद्धि

कम्पनीले समीक्षा अवधिमा १ अर्ब ८६ करोड २७ लाख रुपैयाँ कुल बीमाशुल्क आर्जन गरेको छ। गत आर्थिक वर्षको सोही अवधिमा १ अर्ब ५१ करोड रुपैयाँ रहेको यस्तो बीमाशुल्क यस वर्ष २३.१७ प्रतिशतले बढेको हो।

बीमाशुल्क वृद्धिमा नयाँ व्यवसायसँगै नवीकरण बीमाशुल्कको योगदान रहेको छ। समीक्षा अवधिमा प्रथम बीमाशुल्क ४५.५९ प्रतिशत बढेर ६२ करोड १६ लाख रुपैयाँ पुगेको छ। गत वर्षको पहिलो त्रैमासमा यस्तो बीमाशुल्क ४२ करोड ७० लाख रुपैयाँ थियो।

त्यस्तै, नवीकरण बीमाशुल्क १८.४३ प्रतिशत बढेर १ अर्ब २४ करोड १० लाख रुपैयाँ पुगेको छ। गत वर्षको सोही अवधिमा कम्पनीले १ अर्ब ४ करोड ७९ लाख रुपैयाँ नवीकरण बीमाशुल्क आर्जन गरेको थियो।

पहिलो वर्षको बीमाशुल्क वृद्धिदर नवीकरण बीमाशुल्कको तुलनामा उच्च देखिएको छ। यसले नयाँ व्यवसाय विस्तारमा कम्पनीको गति बढेको संकेत गर्छ।

कम्पनीले समीक्षा अवधिमा ९७ हजार ८९६ नयाँ बीमालेख जारी गरेको छ। गत वर्षको सोही अवधिमा ८१ हजार ११६ नयाँ बीमालेख जारी गरेको थियो। यसअनुसार नयाँ बीमालेख संख्या २०.६९ प्रतिशत बढेको हो।

नयाँ बीमालेखमा प्रतिपोलिसी औसत पहिलो वर्षको बीमाशुल्क ६ हजार ३५० रुपैयाँ पुगेको छ। गत वर्ष यस्तो औसत रकम ५ हजार २६४ रुपैयाँ थियो। यसले नयाँ बीमालेख संख्यामा भएको वृद्धिसँगै प्रतिपोलिसी औसत बीमाशुल्कमा पनि सुधार आएको देखाउँछ।

तर, नयाँ बीमालेख जारी गर्ने क्रम बढे पनि कम्पनीमा कायम कुल चालु बीमालेख संख्या भने १०.२० प्रतिशत घटेर ६ लाख ३३ हजार ११६ मा झरेको छ। गत वर्षको पहिलो त्रैमासमा यस्तो संख्या ७ लाख ५ हजार २ थियो। नयाँ व्यवसाय विस्तार र कुल चालु बीमालेखको संख्याबीच देखिएको यो अन्तरले बीमालेख निरन्तरता तथा नवीकरण व्यवस्थापनमा ध्यान दिनुपर्ने देखाउँछ।

जीवन बीमा कोष १९ अर्ब नाघ्यो, लगानीमा ३१ प्रतिशत वृद्धि

कम्पनीको जीवन बीमा कोष पनि विस्तार भएको छ। समीक्षा अवधिमा जीवन बीमा कोष २३.३४ प्रतिशत बढेर १९ अर्ब ४० करोड पुगेको छ। गत वर्षको सोही अवधिमा यस्तो कोष १४ अर्ब ३१ करोड थियो।

त्यस्तै, अवधि बीमाको अर्जित नभएको बीमाशुल्क जगेडा ३५.६१ प्रतिशत बढेर १९ अर्ब ४० करोड ९५ लाख रुपैयाँ पुगेको छ। गत वर्ष यस्तो रकम १४ अर्ब ३१ करोड २३ लाख रुपैयाँ थियो। जीवन बीमा कोषमा यसको हिस्सा ७२.३ प्रतिशतबाट बढेर ७९.५ प्रतिशत पुगेको छ।

कम्पनीले लगानी पोर्टफोलियोसमेत विस्तार गरेको छ। दीर्घकालीन र अल्पकालीन लगानी गरी कुल लगानी ३१.६७ प्रतिशत बढेर २४ अर्ब ४८ करोड ९ लाख रुपैयाँ पुगेको छ।

कुल लगानीमध्ये दीर्घकालीन लगानी १७.५६ प्रतिशत बढेर २१ अर्ब १८ करोड ३० लाख रुपैयाँ पुगेको छ। अल्पकालीन लगानी भने ४७४.६० प्रतिशत बढेर ३ अर्ब २९ करोड ७८ लाख रुपैयाँ पुगेको छ। गत वर्षको पहिलो त्रैमासमा यस्तो लगानी ५७ करोड ३९ लाख रुपैयाँ थियो।

अल्पकालीन लगानीमा भएको उच्च वृद्धिले कम्पनीको लगानी संरचनामा परिवर्तन आएको देखाउँछ। कम्पनीको कुल लगानी जीवन बीमा कोषको तुलनामा १००.३ प्रतिशत पुगेको छ। गत वर्ष यस्तो अनुपात ९३.९ प्रतिशत थियो। यसबाहेक कम्पनीले बीमितलाई १ अर्ब ७७ करोड २० लाख रुपैयाँ कर्जा प्रवाह गरेको छ।

लगानी आम्दानी बढ्दा कुल आम्दानीमा टेवा

कम्पनीको कुल आम्दानी बढ्नुमा बीमाशुल्कसँगै लगानी तथा कर्जाबाट प्राप्त आम्दानी र लगानीको उचित मूल्य परिवर्तनबाट भएको लाभले योगदान गरेको छ।

समीक्षा अवधिमा लगानी तथा कर्जाबाट प्राप्त आम्दानी १८.६९ प्रतिशत बढेर ४१ करोड ५२ लाख रुपैयाँ पुगेको छ। गत वर्षको पहिलो त्रैमासमा यस्तो आम्दानी ३४ करोड ९८ लाख रुपैयाँ थियो।

त्यस्तै, लगानीको उचित मूल्य परिवर्तनबाट भएको खुद लाभमा उल्लेख्य सुधार आएको छ। गत वर्षको सोही अवधिमा यस शीर्षकमा १२ करोड ३४ लाख रुपैयाँ घाटा रहेकोमा चालु आर्थिक वर्षको पहिलो त्रैमासमा १२ करोड ३६ लाख रुपैयाँ लाभ भएको छ। यसले दुई अवधिबीच २४ करोड ७१ लाख रुपैयाँको सकारात्मक अन्तर सिर्जना गरेको छ।

यद्यपि, लगानीको उचित मूल्य परिवर्तनबाट प्राप्त लाभ बजारको अवस्थासँग प्रभावित हुने भएकाले यसलाई नियमित लगानी आम्दानीसरह मान्न सकिँदैन। कम्पनीको दीर्घकालीन नाफा वृद्धिका लागि नियमित लगानी प्रतिफल कायम राख्नु महत्त्वपूर्ण हुनेछ।्

समीक्षा अवधिमा बीमितलाई भुक्तानी गरिएको कुल दाबी तथा बीमा लाभ ३९.३१ प्रतिशत बढेर ४५ करोड ५९ लाख रुपैयाँ पुगेको छ। गत वर्षको सोही अवधिमा यस्तो रकम ३२ करोड ७२ लाख रुपैयाँ थियो।

त्यस्तै, बीमा करार दायित्वमा भएको वृद्धि ६०.०१ प्रतिशत बढेर १ अर्ब ३० करोड ७४ लाख रुपैयाँ पुगेको छ। गत वर्षको पहिलो त्रैमासमा यस्तो रकम ८१ करोड ७१ लाख रुपैयाँ थियो।

दाबी तथा बीमा करार दायित्वमा भएको परिवर्तनसमेत समेटिएको खुद लाभ तथा दाबीसम्बन्धी खर्च ५२.६७ प्रतिशत बढेर १ अर्ब ६९ करोड २३ लाख रुपैयाँ पुगेको छ। गत वर्ष यस्तो खर्च १ अर्ब १० करोड ८५ लाख रुपैयाँ थियो।

यसअनुसार खुद आर्जित बीमाशुल्कको तुलनामा खुद लाभ तथा दाबीसम्बन्धी खर्चको अनुपात ७७.५५ प्रतिशतबाट बढेर ९५.५९ प्रतिशत पुगेको छ। अर्थात्, खुद आर्जित बीमाशुल्कको तुलनामा बीमा लाभ तथा दायित्वसम्बन्धी खर्चको हिस्सा उल्लेख्य बढेको छ।

दाबी भुक्तानीसम्बन्धी अन्य सूचकमा पनि दबाब देखिएको छ। समीक्षा अवधिमा भुक्तानी गरिएका दाबीको संख्या ४२.६२ प्रतिशत घटेर ५२५ मा सीमित भएको छ। गत वर्षको सोही अवधिमा कम्पनीले ९१५ वटा दाबी भुक्तानी गरेको थियो।

यसको विपरीत भुक्तानी हुन बाँकी दाबीको संख्या ११६.९९ प्रतिशत बढेर ४४७ पुगेको छ। गत वर्ष यस्तो संख्या २०६ थियो। त्यस्तै, भुक्तानी हुन बाँकी कुल दाबी रकम १७४.७२ प्रतिशत बढेर ८ करोड ४९ लाख ५६ हजार रुपैयाँ पुगेको छ। गत वर्षको पहिलो त्रैमासमा यस्तो रकम ३ करोड ९ लाख २५ हजार रुपैयाँ थियो।

दाबी भुक्तानी संख्या घट्नु र भुक्तानी हुन बाँकी दाबीको संख्या तथा रकम बढ्नुले दाबी व्यवस्थापनमा थप प्रभावकारिता आवश्यक रहेको देखाउँछ।

सञ्चालन खर्च पनि बढ्दो क्रममा

बीमा दायित्व र दाबीसम्बन्धी खर्चसँगै कम्पनीको सञ्चालन खर्चमा समेत वृद्धि भएको छ। समीक्षा अवधिमा कर्मचारी सुविधासम्बन्धी खर्च १२.९८ प्रतिशत बढेर ११ करोड ८५ लाख रुपैयाँ पुगेको छ। त्यस्तै, कमिसन खर्च २०.८७ प्रतिशत बढेर १६ करोड ५८ लाख रुपैयाँ पुगेको छ।

अन्य सञ्चालन खर्च भने ४७.९१ प्रतिशत बढेर ९ करोड ४७ लाख रुपैयाँ पुगेको छ। गत वर्षको सोही अवधिमा यस्तो खर्च ६ करोड ४० लाख रुपैयाँ थियो। सेवा शुल्क खर्च पनि २३.०६ प्रतिशत बढेर १ करोड ३९ लाख रुपैयाँ पुगेको छ।

कर्मचारी तथा कमिसन खर्चको वृद्धिदर बीमाशुल्क वृद्धिभन्दा कम रहे पनि अन्य सञ्चालन खर्चको वृद्धिदर उच्च देखिएको छ। यसले व्यवसाय विस्तारसँगै खर्च व्यवस्थापनलाई पनि प्राथमिकतामा राख्नुपर्ने देखाउँछ।

सोल्भेन्सी अनुपात २.५४ गुणामा झर्‍यो

कम्पनीको वित्तीय अवस्थासँग जोडिएको महत्त्वपूर्ण सूचक सोल्भेन्सी मार्जिन अनुपातमा भने गिरावट आएको छ। समीक्षा अवधिमा कम्पनीको सोल्भेन्सी अनुपात ३.६१ गुणाबाट घटेर २.५४ गुणामा सीमित भएको छ। यसअनुसार सोल्भेन्सी अनुपातमा २९.६४ प्रतिशत गिरावट आएको हो।

सोल्भेन्सी अनुपात घटे पनि कम्पनीको अनुपात नियामकीय न्यूनतम सीमाभन्दा माथि छ। न्यूनतम १.५ गुणाको तुलनामा कम्पनीको अनुपात २.५४ गुणा कायम रहेको छ।

तर, जीवन बीमा कोष, लगानी र बीमा दायित्व विस्तार भइरहेको अवस्थामा सोल्भेन्सी अनुपातमा आएको गिरावटलाई महत्त्वपूर्ण सूचकका रूपमा लिनुपर्ने देखिन्छ। आगामी अवधिमा पूँजीगत अवस्था, जोखिमभारित सम्पत्ति र बीमा दायित्वको व्यवस्थापनले यस अनुपातको अवस्थालाई प्रभावित गर्नेछ।

कुल सम्पत्ति २८ अर्ब नाघ्यो

कम्पनीको समेकित वित्तीय विवरणअनुसार चालु आर्थिक वर्षको पहिलो त्रैमाससम्म कुल सम्पत्ति २८ अर्ब ८ करोड ५३ लाख रुपैयाँ पुगेको छ। गत आर्थिक वर्षको अन्त्यमा २६ अर्ब ८२ करोड ७७ लाख रुपैयाँ रहेको कुल सम्पत्ति एक त्रैमासमा ४.६९ प्रतिशत बढेको हो।

कम्पनीको कुल शेयरधनी कोष २.६२ प्रतिशत बढेर ७ अर्ब ९३ करोड २४ लाख रुपैयाँ पुगेको छ। त्यस्तै, कुल दायित्व ५.५२ प्रतिशत बढेर २० अर्ब १५ करोड २८ लाख रुपैयाँ पुगेको छ। शेयरधनी कोषको तुलनामा दायित्वको वृद्धिदर उच्च देखिएको छ।

यस अवधिमा कम्पनीको नगद तथा नगदजन्य सम्पत्ति १५७.५ प्रतिशत बढेर ९८ करोड रुपैयाँ पुगेको छ। गत आर्थिक वर्षको अन्त्यमा यस्तो रकम ३८ करोड ५ लाख रुपैयाँ थियो। अन्य वित्तीय सम्पत्ति पनि दोब्बरभन्दा बढी बढेर ८३ करोड ९७ लाख रुपैयाँ पुगेको छ।

त्यस्तै, कम्पनीको सञ्चित मुनाफा २४.०९ प्रतिशत बढेर १ अर्ब २ करोड ३१ लाख रुपैयाँ पुगेको छ। विपद् जगेडा कोष पनि ७.९७ प्रतिशत बढेर ३१ करोड ३ लाख रुपैयाँ पुगेको छ।

बोनसदर प्रतिहजार २० देखि ७५ रुपैयाँसम्म

कम्पनीले आर्थिक वर्ष २०८१/८२ का लागि घोषणा गरेको बोनसदर प्रतिहजार बीमांक रकममा २० रुपैयाँदेखि ७५ रुपैयाँसम्म कायम गरेको छ। अघिल्लो विवरणको तुलनामा बोनसदरमा परिवर्तन भएको छैन। कम्पनीले अन्तरिम बोनसदर भने सार्वजनिक गरेको छैन।

समग्रमा रिलायबल नेपाल लाइफले चालु आर्थिक वर्षको पहिलो त्रैमासमा बीमाशुल्क आर्जन, नयाँ बीमालेख, जीवन बीमा कोष, लगानी र कुल आम्दानीमा सकारात्मक वृद्धि हासिल गरेको छ। विशेषगरी पहिलो वर्षको बीमाशुल्क ४५.५९ प्रतिशत बढ्नु र कुल आम्दानी ३९.८६ प्रतिशत विस्तार हुनुले व्यवसायको आकार बढिरहेको देखाउँछ।

तर, आम्दानीभन्दा खर्चको वृद्धिदर उच्च हुनु, करअघिको नाफा ४.०४ प्रतिशत मात्रै बढ्नु, चालु बीमालेख संख्या घट्नु, बाँकी दाबी रकम १७४.७२ प्रतिशत बढ्नु र सोल्भेन्सी अनुपातमा करिब ३० प्रतिशत गिरावट आउनु कम्पनीका लागि चुनौतीका रूपमा देखिएका छन्।

त्यसैले आगामी त्रैमासमा व्यवसाय विस्तारसँगै बीमालेखको निरन्तरता, दाबी भुक्तानीको प्रभावकारिता, खर्च नियन्त्रण र पूँजी पर्याप्तताको सन्तुलन कायम राख्नु कम्पनीका लागि महत्त्वपूर्ण हुनेछ। 

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

नेशनल लाइफको २० प्रतिशत लाभांश घोषणा

लेखापरीक्षण प्रतिवेदन नबुझाउने विभिन्न बीमा कम्पनीहरूलाई जरीवाना