सुनको मूल्यमा आज पनि रेकर्ड, तोलाको कति पुग्यो?

BFIS News
2024 Apr 04 12:53

सुनको मूल्यमा आज पनि रेकर्ड, तोलाको कति पुग्यो?

काठमाडौं । नेपाली बजारमा आज (बिहीबार) पनि सुनको मूल्यले पुनः नयाँ रेकर्ड कायम गर्न सफल भएको छ। लगातार नयाँ रेकर्ड बनाइरहेको सुनको मूल्य आज हालसम्मकै उच्च विन्दुमा पुगेको हो।

यसअघि बुधबार हालसम्मकै उच्च मूल्यमा सुनको कारोबार भएको थियो। उक्त दिन सुन प्रतितोला १ लाख ३३ हजार रूपैयाँमा कारोबार भएको थियो। आज सुन प्रतितोला १ लाख ३४ हजार रूपैयाँ पुगेको छ। यो मूल्य पछिल्लो रेकर्डभन्दा एक हजार रूपैयाँ बढी हो।

नेपाल सुनचाँदी व्यवसायी महासंघका अनुसार आज छापावाल सुन प्रतितोला १ लाख ३४ हजार रूपैयाँ र तेजाबी सुन प्रतितोला १ लाख ३३ हजार ३ सय ५० रूपैयाँमा कारोबार भइरहेको छ।

बुधबार छापावाल सुन प्रतितोला १ लाख ३३ हजार रूपैयाँ र तेजाबी सुन प्रतितोला १ लाख ३२ हजार ३ सय ५० रूपैयाँमा कारोबार भएको थियो।

बिहीबार चाँदीको मूल्यले पनि रेकर्ड बनाएको छ। अघिल्लो दिनको तुलनामा प्रतितोला ४० रूपैयाँले चाँदी बढेको हो। चाँदीको मूल्य प्रतितोला १ हजार ६ सय ५० रूपैयाँ पुगेको महासंघले जानकारी दिएको छ। बुधबार चाँदी प्रतितोला १ हजार ६ सय १० रूपैयाँमा कारोबार भएको थियो।