ताप्लेजुङमा २८ प्रतिशत मतदान, हिमाली क्षेत्रका केन्द्रमा पनि मतदान जारी

आयुस बस्नेत
2026 Mar 05 13:28

ताप्लेजुङमा २८ प्रतिशत मतदान, हिमाली क्षेत्रका केन्द्रमा पनि मतदान जारी

फुङलिङ, फागुन २१ गते । ताप्लेजुङ जिल्ला मा दिउँसो १२ः१० बजेसम्म २८ प्रतिशत मत खसेको छ। बिहीबारसम्म जिल्लाभर कुल २५ हजार २२० मत खसेको छ। जसमध्ये १३ हजार ८७२ पुरुष र ११ हजार ३४८ महिला मतदाता रहेका छन्। जिल्लामा कुल ९० हजार ३२७ मतदाता छन्।

जिल्लामा ८० मतदानस्थलअन्तर्गत १२७ मतदान केन्द्र तोकिएका छन्। मतदान केन्द्रहरूमा सुरक्षा व्यवस्था कडा पारिएको र मतदान शान्तिपूर्ण रूपमा भइरहेको प्रमुख जिल्ला अधिकारी शिवराज सेढाइँले जानकारी दिनुभयो।

प्रमुख जिल्ला अधिकारी सेढाइँले मतदान केन्द्रहरूको अनुगमन गरिरहनुभएको छ। साथै फक्ताङलुङ गाउँपालिका अन्तर्गत हिमाली क्षेत्रका फले, याङमा, घुन्सा र ओलाङचुङगोलामा पनि मतदान भइरहेको उहाँले बताउनुभयो। मौसम अनुकूल रहेमा आजै हेलिकोप्टरको सहायतामार्फत मतपेटिका फुङलिङ ल्याउने तयारी गरिएको छ।