सेती नदी आयोजनाको प्रदर्शनका आधारमा भिजन लुम्बिनी उर्जाको रेटिङ यथावत्

काठमाडौँ । इक्रा नेपालले भिजन लुम्बिनी उर्जा कम्पनी लिमिटेडको दीर्घकालीन तथा अल्पकालीन ऋणतर्फको रेटिङ यथावत् राखेको छ । कम्पनीको दीर्घकालीन ऋणतर्फ ‘इक्रा एनपी एलबीबी’ तथा अल्पकालीन ऋणतर्फ ‘इक्रा एनपी ए फोर’ रेटिङ पुनः पुष्टि गरिएको हो ।

इक्रा नेपालका अनुसार यसअघि मूल्याङ्कन गरिएको कुल ४ अर्ब ४० करोड रुपैयाँ दायित्वमध्ये दीर्घकालीन कर्जातर्फ ४ अर्ब ३० करोड रुपैयाँ तथा अल्पकालीन कर्जा सीमा १ अर्ब रुपैयाँ रहेको थियो । हाल कम्पनीको कुल दायित्व ४ अर्ब ३३ करोड ७० लाख रुपैयाँ बराबर कायम रहेको उल्लेख गरिएको छ ।

रेटिङ यथावत् राख्नुको मुख्य आधार कम्पनीले सञ्चालन गरिरहेको २५ मेगावाट क्षमताको सेती नदी जलविद्युत् आयोजनाको मध्यमस्तरीय सञ्चालन प्रदर्शनलाई मानिएको छ । आयोजनाले २०८१ मंसिर मध्यदेखि २०८३ वैशाख मध्यसम्मका दुई सुख्खा मौसममा करिब ९५ प्रतिशत सम्झौता ऊर्जा उत्पादन गर्न सफल भएको जनाइएको छ । यद्यपि, समग्र अवधिमा भने आयोजनाले करिब ८१ प्रतिशत मात्र विद्युत् उत्पादन गरेको तथ्य मूल्याङ्कनमा समावेश गरिएको छ ।

वर्षायाममा प्रसारण लाइनमा बढेको भारका कारण विद्युत् प्रवाहमा केही अवरोध उत्पन्न भएको उल्लेख गर्दै आगामी वर्षायाममा प्रसारण क्षमता विस्तारसँगै यस्तो समस्या घट्ने अपेक्षा गरिएको इक्रा नेपालको भनाइ छ ।

विद्युत् खरिद सम्झौताअनुसार आयोजनामा करिब ३१ प्रतिशत सुख्खा ऊर्जा मिश्रण कायम रहेको र यो न्यूनतम आवश्यक ३० प्रतिशत सीमाभन्दा माथि रहेकाले आपूर्ति जोखिम सीमित रहेको निष्कर्ष निकालिएको छ । साथै, नेपाल विद्युत् प्राधिकरणसँग पूर्वनिर्धारित दर र वृद्धि संरचनासहित विद्युत् खरिद सम्झौता भएकाले बिक्री तथा मूल्य जोखिम न्यून रहेको मूल्याङ्कन गरिएको छ ।

इक्रा नेपालले जलविद्युत् लगानी तथा विकास कम्पनी लिमिटेडको संस्थागत प्रवर्द्धन तथा सञ्चालक समितिमा प्रतिनिधित्वलाई पनि कम्पनीको बलियो पक्षका रूपमा उल्लेख गरेको छ ।

यद्यपि, आयोजनाको प्रति मेगावाट लागत करिब २४ करोड ९० लाख रुपैयाँ पुगेकाले ऋणभार उच्च रहेको उल्लेख गरिएको छ । निश्चित दर तथा सीमित वृद्धिदरका कारण प्रतिफल सूचक कमजोर देखिएको र कुल ऋण तथा सञ्चालन नाफाबीचको अनुपात करिब १० गुणा रहेको तथ्य पनि प्रतिवेदनमा औंल्याइएको छ ।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

७० औं अन्तर्राष्ट्रिय भन्सार दिबसमा के एल दुगड समुहका श्याम सुन्दर कनोडिया सम्मानित

राजश्व राष्ट्रको रगत पसिना भएकोले बगेर गएको टुलुटुलु हेरेर बस्न सकिदैन : अर्थमन्त्री शर्मा