प्रभु बैंकको वित्तीय अवस्था कमजोर, नाफाबाट २४ करोड घाटामा; एनपीएल १५.५५ प्रतिशत पुग्यो

काठमाडौं, साउन ३२ गते । प्रभु बैंकको वित्तीय अवस्था थप कमजोर बनेको छ । आर्थिक वर्ष २०८२/८३ को अपरिष्कृत वित्तीय विवरणअनुसार बैंक अघिल्लो वर्षको नाफाबाट घाटामा गएको छ भने निष्क्रिय कर्जा (एनपीएल) १५.५५ प्रतिशत पुगेको छ ।

अघिल्लो आर्थिक वर्षमा बैंकले ८७ करोड २३ लाख रुपैयाँ खुद नाफा कमाएको थियो । समीक्षा वर्षमा भने बैंक २४ करोड १२ लाख रुपैयाँ खुद घाटामा गएको छ । बैंकको सञ्चित नोक्सानीसमेत बढेर ६ अर्ब ३१ करोड ३१ लाख रुपैयाँ पुगेको छ ।

बैंकको निष्क्रिय कर्जा अघिल्लो वर्षको ७.०१ प्रतिशतबाट बढेर समीक्षा वर्षमा १५.५५ प्रतिशत पुगेको हो । खराब कर्जामा भएको वृद्धिका कारण बैंकले करिब ५ अर्ब रुपैयाँ कर्जा नोक्सानी व्यवस्था (प्रोभिजनिङ) गर्नुपरेको छ ।

खराब कर्जाको वृद्धिको असर बैंकको प्रतिसेयर आम्दानी (ईपीएस) मा समेत परेको छ । समीक्षा वर्षमा बैंकको ईपीएस १.०२ रुपैयाँ ऋणात्मक रहेको छ ।

यस्तै, बैंकको पुँजी कोष अनुपात ११.८३ प्रतिशत र प्राथमिक पुँजी अनुपात ८.८३ प्रतिशतमा झरेको छ । बैंकको कर्जा–निक्षेप अनुपात (सीडी रेसियो) ६७ प्रतिशतमा सीमित रहेको छ ।

प्रभु बैंकको वित्तीय अवस्था कमजोर बन्नुमा विगतमा सिर्जित खराब कर्जाको थुप्रो, कर्जा असुलीमा देखिएको चुनौती तथा व्यवसाय विस्तारमा आएको सुस्ततालाई प्रमुख कारणका रूपमा हेरिएको छ ।

बैंकको नेतृत्व सम्हालेको करिब ६ महिनाको अवधिमा नयाँ व्यवस्थापनले खराब कर्जा असुली र व्यवसाय विस्तारमा अपेक्षित सुधार ल्याउन नसकेको भन्दै प्रश्नसमेत उठेका छन् । बैंकिङ क्षेत्रमा अनुभवी मानिएका सुमन शर्माले नेतृत्व सम्हालेपछि वित्तीय अवस्था सुधार हुने अपेक्षा गरिए पनि पछिल्लो वित्तीय विवरणले त्यसको विपरीत अवस्था देखाएको छ ।

खराब कर्जा बढ्दै जाँदा बैंकको नाफामा प्रत्यक्ष दबाब परेको छ । प्रोभिजनिङमा ठूलो रकम छुट्याउनुपर्दा नाफा प्रभावित भएको हो । साथै, कर्जा प्रवाहमा अपेक्षित विस्तार हुन नसक्दा बैंकको व्यवसायिक आम्दानीमा समेत दबाब परेको देखिन्छ ।

बैंकको वर्तमान अवस्थाले खराब कर्जा व्यवस्थापन र कर्जा असुलीलाई तत्काल प्राथमिकतामा राख्नुपर्ने देखाएको छ । साथै, नयाँ व्यवसाय विस्तार गर्दै बैंकको आम्दानीको आधार बलियो बनाउनु र पुँजी तथा वित्तीय स्वास्थ्यमा सुधार ल्याउनु व्यवस्थापनका लागि प्रमुख चुनौती बनेको छ ।

यदि निष्क्रिय कर्जा नियन्त्रण र असुली प्रक्रियामा सुधार आउन सकेन भने आगामी दिनमा बैंकको नाफा, लाभांश क्षमता तथा समग्र वित्तीय स्वास्थ्यमा थप दबाब पर्न सक्ने देखिन्छ ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?