पुँजीबजार सुधारको २१ बुँदे कार्ययोजना समयमै कार्यान्वयन गर्न ब्रोकर संघको आग्रह
- BFIS News
- 2026 Nov 18 14:20
काठमाडौं । नेपाल स्टक ब्रोकर एसोसिएसन अफ नेपाल (एसबीएएन) ले पुँजीबजारको विकास, सुधार र सुदृढीकरणका लागि अर्थ मन्त्रालयले अघि सारेको २१ बुँदे कार्ययोजना प्रभावकारी रूपमा कार्यान्वयन गर्न नेपाल स्टक एक्सचेञ्ज (नेप्से) लाई आग्रह गरेको छ।
एसोसिएसनका अध्यक्ष सागर ढकालको नेतृत्वमा गएको प्रतिनिधिमण्डलले बुधबार नवनियुक्त नेप्सेका प्रमुख कार्यकारी अधिकृत (सीईओ) प्रताप सुवेदीसँग भेट गरी पुँजीबजारका समसामयिक समस्या, सुधारका आवश्यकता र बजारको दिगो विकासका विषयमा छलफल गरेको हो। सो अवसरमा प्रतिनिधिमण्डलले सीईओ सुवेदीलाई नयाँ जिम्मेवारीका लागि बधाई तथा सफल कार्यकालको शुभकामना दिएको थियो।
भेटका क्रममा अध्यक्ष ढकालले अर्थ मन्त्रालयले पुँजीबजारको सुधार तथा पुनरुत्थानका लागि ल्याएको २१ बुँदे कार्ययोजना समयमै र प्रभावकारी रूपमा कार्यान्वयन गर्नुपर्नेमा जोड दिए। उक्त कार्ययोजना उचित रूपमा कार्यान्वयन भए पुँजीबजारमा विद्यमान संरचनागत तथा सञ्चालनसम्बन्धी समस्या समाधान हुनुका साथै लगानीकर्ताको विश्वास अभिवृद्धि गर्न सहयोग पुग्ने उनको भनाइ थियो।
पुँजीबजारले सर्वसाधारणको बचतलाई परिचालन गरी अर्थतन्त्रका उत्पादनशील क्षेत्रमा लगानी प्रवाह गर्ने महत्त्वपूर्ण भूमिका निर्वाह गर्ने उल्लेख गर्दै ढकालले बजारका विद्यमान समस्या समाधान र आवश्यक नीतिगत सुधारमा ढिलाइ गर्न नहुने बताए। पारदर्शी, व्यवस्थित, प्रभावकारी र लगानीकर्तामैत्री बजार निर्माणका लागि सुधारका कार्यक्रमलाई व्यवहारमा उतार्नुपर्नेमा उनले जोड दिए।
उनले पुँजीबजारको दिगो विकासका लागि नियामक निकाय, नेप्से, धितोपत्र दलाल व्यवसायी तथा अन्य सरोकारवालाबीच प्रभावकारी समन्वय र सहकार्य आवश्यक रहेको बताए। नीतिगत सुधार मात्र पर्याप्त नहुने भन्दै त्यसको प्रभावकारी कार्यान्वयन, संस्थागत समन्वय र सरोकारवालाको सक्रिय सहभागिता पनि उत्तिकै महत्त्वपूर्ण हुने उनको भनाइ थियो।
एसोसिएसनले उठाएका विषयमा प्रतिक्रिया दिँदै नेप्सेका सीईओ सुवेदीले पुँजीबजारको विकास र सुधारका लागि सम्बन्धित सबै पक्षसँग सहकार्य गरेर अघि बढ्न नेप्से तयार रहेको बताए। उनले अर्थ मन्त्रालयको २१ बुँदे पुँजीबजार सुधार तथा पुनरुत्थान कार्ययोजना कार्यान्वयनका लागि आवश्यक पहल गर्ने र त्यससँग सम्बन्धित कामलाई अघि बढाउने प्रतिबद्धता व्यक्त गरे।
पुँजीबजारमा विद्यमान चुनौती समाधान गर्न सामूहिक प्रयास आवश्यक रहेको उल्लेख गर्दै सुवेदीले बजारको समग्र कार्यसम्पादन सुधार र दिगो विकासका लागि सम्बन्धित निकाय तथा सरोकारवालासँग समन्वय र सहकार्य गरिने बताए।
छलफलमा दुवै पक्षले पुँजीबजारको दिगो विकासका लागि नीतिगत सुधार, संस्थागत समन्वय, प्रभावकारी कार्यान्वयन र सरोकारवालाबीच निरन्तर सहकार्य आवश्यक रहेको निष्कर्ष निकालेका छन्। साथै, बजारमा देखिएका व्यावहारिक समस्या पहिचान गरी समाधानका उपाय खोज्न नेप्से र बजारका सहभागीबीच निरन्तर संवाद आवश्यक रहेकोमा जोड दिइएको थियो।
एसोसिएसनले नेपालको पुँजीबजारलाई थप पारदर्शी, व्यवस्थित, प्रभावकारी र लगानीकर्तामैत्री बनाउन नेप्सेसँग रचनात्मक सहकार्य जारी राख्ने प्रतिबद्धता पनि व्यक्त गरेको छ। बजारको दीर्घकालीन विकास र लगानीकर्ताको विश्वास अभिवृद्धिका लागि नेप्से, ब्रोकर, नियामक निकाय तथा अन्य सरोकारवालाबीचको सहकार्य महत्त्वपूर्ण हुने एसोसिएसनको धारणा छ।
![$adHeader[0]['title']](https://www.bfisnews.com/images/bigyapan/1794925158_1200x100.gif)




 (3) (1).gif)


.gif)
.gif)








प्रतिक्रिया