५ महानगरले तोकिएको समयमा बजेट प्रस्तुत गर्दा काठमाडौँ महानगरको भने रोकियो

काठमाडौं। संविधान र कानुनी प्रावधानअनुसार प्रत्येक स्थानीय तहले असार १० गतेभित्र आगामी आर्थिक वर्षको बजेट प्रस्तुत गर्नुपर्ने व्यवस्था रहेको छ।

सोहीअनुसार मंगलबार देशभरका अधिकांश स्थानीय तहले नयाँ आर्थिक वर्ष २०८२/८३ का लागि बजेट सार्वजनिक गरेका छन्। केही स्थानीय तहले भने समयअघि नै बजेट पेश गरेका थिए।

देशभरका ६ वटा महानगरपालिकामध्ये विराटनगर, वीरगञ्ज, ललितपुर, भरतपुर र पोखरा महानगरले तोकिएको मितिमा बजेट सार्वजनिक गरेका छन्। तर, संघीय राजधानी काठमाडौं महानगरपालिकाले भने आन्तरिक विवादका कारणले बजेट तोकिएको समयमा प्रस्तुत गर्न सकेन।

काठमाडौं महानगरको नगरसभा लामो समयदेखि बस्न नसकेको अवस्था छ। त्यसका कारण नीति, कार्यक्रम र बजेटमाथि छलफल हुन सकेको छैन। महानगरपालिकाको तर्फबाट यसबारेमा अहिलेसम्म कुनै आधिकारिक धारणा सार्वजनिक गरिएको छैन।

संघीय सरकारले काठमाडौं महानगरका लागि खटाएको प्रमुख प्रशासकीय अधिकृत र प्रमुख बालेन्द्र साहबीच असमझदारी रहेको आशंका गरिएको छ। यसले पनि बजेट रोकिनुको कारण भएको अनुमान गरिएको छ।

काठमाडौं महानगरपालिका संघीय सरकारका केही मन्त्रालयभन्दा ठूलो बजेटको जिम्मेवारी लिने निकाय भएकाले त्यसको बजेटप्रति आम जनताको चासो रहँदै आएको छ।

यस्तै, देशका अन्य केही स्थानीय तहमा समेत नीति तथा कार्यक्रम र बजेट समयमै प्रस्तुत हुन सकेका छैनन्, जसको पछाडि आन्तरिक विवाददेखि प्राविधिक समस्या लगायतका कारण देखाइएको छ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन