![$adHeader[0]['title']](https://www.bfisnews.com/images/bigyapan/1759825227_1100x100.gif)
वाणिज्य बैंकहरुले मंसिरका लागि नयाँ ब्याजदर लागू गरे, १० बैंकले घटाए दर
- BFIS News
- 2025 Nov 16 10:10
काठमाडौं। मंसिर महिनाका लागि वाणिज्य बैंकहरुले प्रकाशित गरेको नयाँ ब्याजदर सूची सार्वजनिक भएको छ। २० मध्ये १० बैंकले व्यक्तिगत मुद्दति निक्षेपको अधिकतम ब्याजदर घटाएका छन् भने बाँकी १० बैंकले कात्तिक महिनाकै ब्याजदरलाई निरन्तरता दिएका छन्।
प्रकाशित विवरण अनुसार एनआईसी एशिया, सिद्धार्थ, हिमालयन, स्ट्याण्डर्ड चार्टर्ड, प्राइम कमर्सियल, सिटिजन्स, नबिल, नेपाल एसबिआई, सानिमा र कुमारी बैंकले मंसिर महिनाका लागि व्यक्तिगत मुद्दति निक्षेपमा लागू हुने अधिकतम ब्याजदर घटाएका छन्।
एनआईसी एशियाले सबैभन्दा धेरै घटायो ब्याजदर
उक्त महिनामा सबैभन्दा बढी ब्याजदर घटाउने बैंक एनआईसी एशिया बैंक रहेको छ। सो बैंकले कात्तिक महिनाको तुलनामा ०.७५ प्रतिशतविन्दुले ब्याजदर घटाएको हो। मंसिरमा व्यक्तिगत मुद्दति निक्षेपमा एनआईसी एशियाले अधिकतम ५.७५ प्रतिशत ब्याज दिनेछ।
एनआईसी एशियाले संस्थागत मुद्दति निक्षेपको अधिकतम ब्याजदर पनि घटाएको छ, जसले कुल ब्याजदर संरचना झन् न्यूनतर्फ धकेलेको देखिन्छ।
कुन बैंकले कति दिनेछ ब्याज?
मंसिर महिनाको व्यक्तिगत मुद्दति निक्षेपमा सबैभन्दा बढी ब्याज ग्लोबल आइएमई बैंकले दिने भएको छ। सो बैंकले अधिकतम ६ प्रतिशत ब्याज प्रदान गर्नेछ।
सबैभन्दा कम ब्याजदर भने स्ट्याण्डर्ड चार्टर्ड बैंकले प्रस्ताव गरेको छ। उक्त बैंकले व्यक्तिगत मुद्दति निक्षेपमा अधिकतम ४.७ प्रतिशत ब्याज दिनेछ।
औसत ब्याजदरमा पनि गिरावट
कात्तिक महिनाको तुलनामा मंसिरमा वाणिज्य बैंकहरुको समग्र ब्याजदरमा गिरावट आएको छ। व्यक्तिगत मुद्दति निक्षेपको अधिकतम औसत ब्याजदर ०.१६ प्रतिशतविन्दुले घट्दै ५.२० प्रतिशतबाट ५.०४ प्रतिशतमा झरेको छ।
त्यस्तै संस्थागत मुद्दति निक्षेपमा पनि ०.०७ प्रतिशतविन्दुले ब्याजदर घटेको छ, जसले बजारमा समग्र ब्याजदरको दबाब निरन्तर कायम रहेको संकेत गर्छ।
मंसिरमा दर घटाउने बैंकको संख्या र औसत व्याजदरमा आएको गिरावटले बैंकिङ क्षेत्रमा तरलता, बजार प्रतिस्पर्धा र मौद्रिक अवस्थाको प्रभाव झल्काएको विश्लेषकहरुको भनाइ छ।
शेयर गर्नुहोस
प्रतिक्रिया दिनुहोस्
सम्बन्धित समाचार
.jpeg)
प्रतिक्रिया