चालू पुँजी कर्जा व्यवस्थामा राष्ट्र बैंकको नयाँ लचकता, पुनरतालिकीकरणको विशेष सुविधा

काठमाडौं, फागुन २९ — नेपाल राष्ट्र बैंकले मौद्रिक नीतिको अर्धवार्षिक समीक्षामा घोषणा गरेअनुसार ‘चालू पुँजी कर्जासम्बन्धी मार्गदर्शन, २०७९ (दोस्रो संशोधन सहित)’ मा महत्वपूर्ण परिमार्जन गर्दै बैंक तथा वित्तीय संस्थाहरूलाई कर्जा व्यवस्थापनमा थप लचकता प्रदान गरेको छ।

केन्द्रीय बैंकले शुक्रबार एक सर्कुलर जारी गर्दै बैंकहरूलाई ‘पर्मानेन्ट वर्किङ क्यापिटल’ को आवश्यकताका लागि प्रवाह गरिने आवधिक कर्जाको अवधि आफ्नै नीति बमोजिम निर्धारण गर्न पाउने व्यवस्था गरेको हो। यसअघि यस्तो कर्जाको अवधि ३ देखि १० वर्षसम्म हुनुपर्ने बाध्यात्मक व्यवस्था रहेकोमा अब बैंकहरूले आफ्नो चालू पुँजी कर्जा नीति अनुसार अवधि तय गर्न सक्नेछन्।

संशोधित व्यवस्था अनुसार ऋणीहरूलाई राहत दिने उद्देश्यले राष्ट्र बैंकले कर्जा पुनरतालिकीकरणमा विशेष सुविधा समेत घोषणा गरेको छ। यसअघि प्रवाह भइसकेको पर्मानेन्ट वर्किङ क्यापिटल कर्जालाई ऋणीको नगद प्रवाह तथा वित्तीय विवरण विश्लेषण गरी २०८३ असार मसान्तसम्म एकपटकका लागि पुनरतालिकीकरण गर्न सकिने व्यवस्था गरिएको छ। राष्ट्र बैंकका अनुसार यसरी गरिएको पुनरतालिकीकरणलाई कर्जा वर्गीकरण तथा कर्जा नोक्सानी व्यवस्थाको प्रयोजनका लागि ‘पुनरतालिकीकरण भएको’ मानिने छैन।

यसैगरी, क्यास क्रेडिट कर्जा खाताको सञ्चालन सम्बन्धी व्यवस्थामा पनि परिमार्जन गरिएको छ। नयाँ व्यवस्था अनुसार चालू पुँजी कर्जाका विभिन्न खातामध्ये क्यास क्रेडिट खातामा आर्थिक वर्षको कुनै एक समयमा कम्तीमा लगातार ७ दिनसम्म कर्जा सीमाको ३० प्रतिशतभन्दा कम मात्रै बक्यौता कायम गरे पुग्ने भएको छ। यसअघि यस्तो सीमालाई १० प्रतिशतसम्म झार्नुपर्ने प्रावधान रहेकोमा संशोधनमार्फत यसलाई खुकुलो बनाइएको हो।

त्यस्तै २ करोड रुपैयाँसम्मको चालू पुँजी कर्जा तथा उत्पादनमूलक उद्योगको हकमा ४ करोड रुपैयाँसम्मको चालू पुँजी कर्जा उपयोग गर्ने ऋणीहरूको हकमा पनि पर्मानेन्ट वर्किङ क्यापिटलको पहिचान भएमा बैंकहरूले आवधिक प्रकृतिको चालू पुँजी कर्जा प्रदान गर्न सक्ने व्यवस्था गरिएको छ।

नेपाल राष्ट्र बैंकको बैंक तथा वित्तीय संस्था नियमन विभागले जारी गरेको यो निर्देशन नेपाल राष्ट्र बैंक ऐन, २०५८को दफा ७९ ले दिएको अधिकार प्रयोग गरी कार्यान्वयनमा ल्याइएको हो।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?