स्वास्थ्य बीमा संकट गहिरियो, निजी अस्पतालमा नियमित सेवा स्थगित

काठमाडौं ।  सरकारको स्वास्थ्य बीमा कार्यक्रम आर्थिक संकटका कारण प्रभावित बनेको छ।

स्वास्थ्य बीमा बोर्डले निजी अस्पतालहरूमा आकस्मिक बाहेकका सबै बीमा सेवा अस्थायी रूपमा रोक्ने निर्णय गरेपछि बीमित नागरिकहरूको उपचार पहुँचमा असर पर्ने भएको छ।

स्वास्थ्य बीमा बोर्डले जारी गरेको सूचनाअनुसार जेठ १६ गतेदेखि अर्को निर्णय नभएसम्म निजी स्वास्थ्य संस्थाबाट प्रदान हुँदै आएका नियमित स्वास्थ्य बीमा सेवा स्थगित गरिनेछ। बोर्डले आर्थिक अभावका कारण यस्तो निर्णय लिनुपरेको जनाएको छ।

निर्णयसँगै अब स्वास्थ्य बीमा कार्यक्रममा आबद्ध नागरिकहरूले निजी अस्पतालमा ओपीडी सेवा, नियमित स्वास्थ्य परीक्षण, शल्यक्रिया, औषधि तथा अन्य उपचार सेवा सहज रूपमा प्राप्त गर्न नसक्ने भएका छन्। आकस्मिक सेवा भने निरन्तर सञ्चालनमा रहने बोर्डले जनाएको छ।

देशभर स्वास्थ्य बीमा कार्यक्रममा सहभागी ३६ वटा निजी अस्पताल तथा मेडिकल कलेज यस निर्णयबाट प्रभावित हुने भएका छन्।

सरकारले सबै नागरिकलाई स्वास्थ्य सेवामा पहुँच विस्तार गर्ने उद्देश्यसहित स्वास्थ्य बीमा कार्यक्रम सञ्चालनमा ल्याएको थियो। तर पछिल्ला वर्षहरूमा आर्थिक व्यवस्थापन, प्रशासनिक कमजोरी तथा निजी अस्पताललाई भुक्तानी गर्न बाँकी रकम बढ्दै जाँदा कार्यक्रम दबाबमा परेको देखिएको छ।

स्रोतहरूका अनुसार सरकारले निजी अस्पतालहरूलाई दिनुपर्ने अर्बौं रुपैयाँ लामो समयदेखि भुक्तानी गर्न नसक्दा निजी स्वास्थ्य संस्थाहरूले निरन्तर दबाब दिँदै आएका थिए। त्यसपछि स्वास्थ्य बीमा बोर्डले सेवा कटौतीको निर्णय गरेको जनाइएको छ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन