प्रभु इन्स्योरेन्स प्रविधिमैत्री र ग्राहककेन्द्रित बन्दै अघि बढिरहेको छ  : अध्यक्ष मल्ल

काठमाडौं, साउन २३ । प्रभु इन्स्योरेन्स लिमिटेडका अध्यक्ष राजेन्द्र मल्लले कम्पनी विश्वसनीय, पारदर्शी, प्रविधिमैत्री र ग्राहककेन्द्रित बन्दै  थप सशक्त रूपमा अघि बढीरहेको बताएका छन्।

कम्पनीको ३१औँ वार्षिक दिवसका अवसरमा मन्तव्य दिँदै अध्यक्ष मल्लले प्रभु इन्स्योरेन्सको तीन दशकभन्दा लामो यात्रा विश्वास, मेहनत, निरन्तरता, परिवर्तनसँगको अनुकूलन र सामूहिक प्रतिबद्धताको परिणाम भएको बताए। उनले ३१ वर्षको अवधिमा कम्पनीले नेपाली निर्जीवन बीमा क्षेत्रमा आफ्नो छुट्टै पहिचान बनाउन सफल भएको उल्लेख गरे।

अध्यक्ष मल्लका अनुसार ५ करोड रुपैयाँ चुक्ता पुँजीबाट सुरु भएको प्रभु इन्स्योरेन्स अहिले करिब १ अर्ब ७० करोड १० लाख रुपैयाँ चुक्ता पुँजी, देशभर ६० वटा शाखा तथा उपशाखा र २६७ भन्दा बढी कर्मचारीको सशक्त टिमसहित बीमा सेवा प्रदान गरिरहेको छ। आर्थिक वर्ष २०८१/८२ मा कम्पनीको नेटवर्थ ३ अर्ब ३९ करोड रुपैयाँभन्दा बढी र खुद नाफा २० करोड रुपैयाँभन्दा बढी रहेको उनले जानकारी दिए।

उनले कम्पनीका लागि वित्तीय सूचक र व्यवसायिक विस्तारभन्दा पनि ग्राहकको विश्वास सबैभन्दा ठूलो पुँजी भएको बताए। ग्राहकले आफ्नो सम्पत्ति, व्यवसाय तथा भविष्यसँग जोडिएका जोखिम कम्पनीलाई विश्वास गरेर सुम्पिने भएकाले ग्राहकको विश्वास कायम राख्नु र सेवा अझ उत्कृष्ट बनाउनु कम्पनीको पहिलो प्राथमिकता हुनुपर्ने उनको भनाइ छ।

अध्यक्ष मल्लले आगामी दिनमा बीमा व्यवसायलाई प्रविधिसँग जोडेर अघि बढाउनुपर्नेमा जोड दिए। विश्वमा डिजिटलाइजेसन, आर्टिफिसियल इन्टेलिजेन्स, डेटा एनालिटिक्स र अटोमेसन  व्यवसायका अनिवार्य आवश्यकता बन्दै गएको भन्दै उनले प्रभु इन्स्योरेन्सले पनि प्रविधिलाई व्यवसायको केन्द्रमा राख्नुपर्ने बताए।

उनका अनुसार कम्पनीले डिजिटल बीमा सेवा, छिटो र प्रभावकारी दाबी व्यवस्थापन, ग्राहकमैत्री प्रणाली, आधुनिक जोखिम मूल्याङ्कन तथा डेटा आधारित निर्णय प्रक्रियालाई थप प्रभावकारी बनाउन आवश्यक छ।

नेपालमा बीमाको पहुँच विस्तारका लागि अझै ठूलो सम्भावना रहेको उल्लेख गर्दै अध्यक्ष मल्लले कृषि, पर्यटन, जलविद्युत्, उद्योग, पूर्वाधार, साना तथा मझौला व्यवसाय तथा नयाँ प्रविधिमा आधारित व्यवसायमा बीमाको आवश्यकता बढ्दै गएको बताए। बीमा सेवाको पहुँच शहरमा मात्र सीमित नराखी गाउँ–गाउँसम्म विस्तार गर्नुपर्नेमा उनले जोड दिए।

“हाम्रो लक्ष्य केवल ठूलो कम्पनी बन्नु होइन, विश्वसनीय, पारदर्शी, प्रविधिमैत्री, ग्राहककेन्द्रित र उत्कृष्ट सेवा दिने कम्पनी बन्नु हो,” अध्यक्ष मल्लले भने।

उनले ३० वर्षभन्दा लामो इतिहासले कम्पनीलाई गौरव प्रदान गरेको भन्दै आगामी दिनमा यही अनुभव र उपलब्धिबाट प्रेरणा लिएर थप ठूलो उपलब्धि हासिल गर्ने जिम्मेवारी कम्पनीको रहेको बताए।

अध्यक्ष मल्लले प्रभु इन्स्योरेन्सको यात्रामा साथ दिने सम्पूर्ण शेयरधनी, बीमित ग्राहक, सञ्चालक समिति, कर्मचारी, अभिकर्ता, सर्भेयर, पुनर्बीमा साझेदार, नियामक निकाय तथा शुभेच्छुकप्रति आभार व्यक्त गरेका छन्।

प्रतिक्रिया दिनुहोस्

सम्बन्धित समाचार

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

नेशनल लाइफको २० प्रतिशत लाभांश घोषणा

लेखापरीक्षण प्रतिवेदन नबुझाउने विभिन्न बीमा कम्पनीहरूलाई जरीवाना