इन्टरनेट सेवामा शीर्ष पाँच कम्पनीको प्रभुत्व, वर्ल्डलिंकको अग्रता

BFIS News
2025 Aug Sun 12:45

काठमाडौं, साउन १८। नेपालको इन्टरनेट बजारमा केही गिनिएका कम्पनीहरूको वर्चस्व देखिएको छ। नेपाल दूरसञ्चार प्राधिकरणको पछिल्लो विवरण अनुसार, शीर्ष पाँच इन्टरनेट सेवा प्रदायक (आईएसपी) कम्पनीहरूले देशभरको ७२ प्रतिशत बजार हिस्सा ओगटेका छन्।

प्राधिकरणको तथ्यांकअनुसार, हाल देशभर ३२ लाख ४८ हजार ६७४ जना फिक्स ब्रोडब्याण्ड इन्टरनेट प्रयोगकर्ता छन्। तीमध्ये सबैभन्दा धेरै, अर्थात् १० लाखभन्दा बढी ग्राहक वर्ल्डलिंक कम्युनिकेसन्स लिमिटेडका रहेका छन्। कम्पनीले ३१.१७ प्रतिशत बजार हिस्सा ओगट्दै अग्रता कायम राखेको छ।

दोस्रो स्थानमा रहेको डिस मिडिया नेटवर्क लिमिटेडले ३ लाख ६१ हजार ३९४ ग्राहकसहित ११.१२ प्रतिशत बजार हिस्सा ओगटेको छ। यस्तै, **नेपाल दूरसञ्चार कम्पनी लिमिटेड (एनटीसी)**का ३ लाख ५४ हजार ४३८ ग्राहक छन्, जसको बजार हिस्सा १०.९१ प्रतिशत रहेको छ।

तेस्रो स्थानमा रहेको भायानेट कम्युनिकेसन्स लिमिटेडका ३ लाख १९ हजार ग्राहक छन् भने कम्पनीको बजार हिस्सा ९.८२ प्रतिशत रहेको छ। पाँचौं स्थानमा रहेको सुबिसु केबलनेट लिमिटेडका ग्राहक संख्या २ लाख ९९ हजार छ, जसको बजार हिस्सा ९.२१ प्रतिशत छ।

अन्य प्रतिस्पर्धी कम्पनीहरूको अवस्था यस्तो छ:

क्लासिक टेक: १ लाख ८७ हजार १३७ ग्राहक, बजार हिस्सा ५.७६%
वेबसर्फर नेपाल: १ लाख ७५ हजार ६५९ ग्राहक, बजार हिस्सा ५.४१%
टेकमाइन्ड्स नेटवर्क: १ लाख १ हजार ५८० ग्राहक, बजार हिस्सा ३.१३%
सीजी कम्युनिकेसन्स (चौधरी समूह): ८२ हजार ८६० ग्राहक, बजार हिस्सा २.५५%
वाइफाइ नेपाल: ८० हजार ३७१ ग्राहक, बजार हिस्सा २.४७%

अन्य कम्पनीहरू:

ब्रोडलिंक नेटवर्क: १.६४%
फाइबरवर्ल्ड कम्युनिकेसन्स: १.३१%
सजिलो नेट: १.०६%

एक प्रतिशतभन्दा कम बजार हिस्सामा रहेका कम्पनीहरूमा फस्र्टलिंक कम्युनिकेसन, कनेक्ट नेपाल नेटवर्क, एरोनेट, चित्रवन युनिक नेट, पोखरा इन्टरनेट, एभरेष्ट वायरलेस नेटवर्क, आइ.जोन लगायतका कम्पनी छन्।

नेपालमा इन्टरनेट सेवाको पहुँच विस्तारसँगै प्रतिस्पर्धा पनि तीव्र बन्दै गएको छ। ग्राहक संख्या वृद्धिसँगै सेवाको गुणस्तर र मूल्य प्रतिस्पर्धाको केन्द्रमा रहेको प्रस्ट हुन्छ।