आर्थिक सूचकाङ्कमा सकारात्मक प्रगति, मुद्रास्फीति १.८७ प्रतिशतमा सीमित

BFIS News
2025 Oct 14 17:12

आर्थिक सूचकाङ्कमा सकारात्मक प्रगति, मुद्रास्फीति १.८७ प्रतिशतमा सीमित

काठमाडौं, असोज २८ – नेपाल राष्ट्र बैंकले सार्वजनिक गरेको पछिल्लो आर्थिक तथ्याङ्कअनुसार वार्षिक विन्दुगत आधारमा उपभोक्ता मूल्य सूचकाङ्कमा आधारित मुद्रास्फीति १.८७ प्रतिशत रहेको छ, जुन सन्तोषजनक सीमा भित्रै रहेको देखिन्छ।

राष्ट्र बैंकका अनुसार देशको कुल विदेशी विनिमय सञ्चिति रु. २८८१ अर्ब ३५ करोड पुगेको छ। अमेरिकी डलरमा यो सञ्चिति २० अर्ब ४१ करोड बराबरको रहेको छ, जसले करिब १६ महिनासम्मको वस्तु तथा सेवा आयात धान्न पर्याप्त हुने देखिन्छ।

चालु आर्थिक अवस्थालाई हेर्दा चालु खाता रु. १३० अर्ब ६९ करोड र शोधनान्तर स्थिति रु. १५३ अर्ब ६८ करोडले बचतमा रहेको छ, जुन अर्थतन्त्रको सन्तुलित अवस्थालाई जनाउने संकेत हो।

त्यस्तै, वैदेशिक रोजगारबाट प्राप्त विप्रेषण आप्रवाहमा पनि उल्लेख्य वृद्धि देखिएको छ। नेपाली रुपैयाँमा यो ३३.१ प्रतिशतले र अमेरिकी डलरमा २७.६ प्रतिशतले बढेको हो। २०८२ सालको भदौ महिनामा मात्रै विप्रेषण रु. १७४ अर्ब ६७ करोड पुगेको छ।

निर्याततर्फ ८८.६ प्रतिशतले र आयाततर्फ १६.२ प्रतिशतले वृद्धि भएको देखिएको छ, जसले निर्यात प्रवर्द्धनतर्फ सरकारको प्रयास सफल हुँदै गएको जनाउँछ।

नेपाल सरकारको कुल खर्च रु. १८० अर्ब १७ करोड पुगेको छ भने सोही अवधिमा राजस्व परिचालन रु. १५७ अर्ब ५३ करोड रहेको छ।

विस्तृत मुद्राप्रदायमा ०.३ प्रतिशतको वृद्धि भएको छ। वार्षिक विन्दुगत आधारमा भने मुद्राप्रदाय १२.४ प्रतिशतले बढेको छ। बैंक तथा वित्तीय संस्थाबाट सञ्चालित निक्षेप ०.५ प्रतिशतले र निजी क्षेत्रमा प्रवाहित कर्जा ०.९ प्रतिशतले बढेको छ। वार्षिक विन्दुगत रूपमा हेर्दा निक्षेपको वृद्धिदर १२.५ प्रतिशत र कर्जाको वृद्धिदर ७.८ प्रतिशत रहेको छ।

बैंकिङ क्षेत्रमा अन्तरबैंक कारोबारको भारित औसत ब्याजदर २.७५ प्रतिशत रहेको छ भने ९१ दिनको ट्रेजरी बिलको ब्याजदर २.१३ प्रतिशत रहेको छ। वाणिज्य बैंकहरूको निक्षेपमा तिर्इने औसत ब्याजदर ३.९६ प्रतिशत र कर्जामा लिइने औसत ब्याजदर ७.६६ प्रतिशत पुगेको राष्ट्र बैंकले जनाएको छ। यसरी हालसालैका आर्थिक सूचकाङ्कहरूले नेपालको आर्थिक स्थायित्व तथा वित्तीय प्रणालीको सुदृढता देखाइरहेका छन्।