कास्कीमा प्रहरीमाथि आक्रमण प्रकरणमा १० जना पक्राउ

लेखनाथ, कात्तिक ११ गते । कास्की जिल्लामा प्रहरी कार्यालयहरूमा आगजनी, तोडफोड र हातहतियार लुटपाटमा संलग्न भएको आरोपमा १० जना पक्राउ परेका छन् । कास्की प्रहरीले २०८२ भदौ २४ गतेको आन्दोलनका क्रममा प्रहरी इकाइहरूमा तोडफोड, आगजनी र हातहतियार लुटपाट गरी आतंक सिर्जना गरेको आरोपमा ती व्यक्तिहरूलाई नियन्त्रणमा लिएको हो ।

मङ्गलबार आयोजित पत्रकार सम्मेलनमा जिल्ला प्रहरी कार्यालय कास्कीका प्रहरी नायब उपरीक्षक हरिबहादुर बस्नेतले घटनामा संलग्न १० जनालाई पक्राउ गरिएको जानकारी दिनुभयो । उहाँका अनुसार, जिल्ला प्रहरी कार्यालय कास्कीमा हतियार लुटपाट र आगजनीमा चार जना, वडा प्रहरी कार्यालय बगरमा हतियारमा आगो लगाउने एक जना, र प्रहरी चौकी नयाँपुलमा आगजनी गर्ने पाँच जना गरी कुल १० जनालाई पक्राउ गरिएको हो ।

पक्राउ परेकामाथि कास्की जिल्ला अदालतबाट अपराधिक उपद्रवसम्बन्धी मुद्दामा थप अनुसन्धानका लागि छ दिनको म्याद लिइएको प्रहरीले जनाएको छ । पक्राउ परेकामध्ये धादिङ त्रिपुरासुन्दरी–४ का २४ वर्षीय राजेश मक्रान्ती, पोखरा–४ का ५४ वर्षीय नारायण साई, पोखरा–११ का २२ वर्षीय अरुण विक, पोखरा–१ का ४१ वर्षीय रुपेश मगर, पोखरा–१ का ४३ वर्षीय दिपु साई, अन्नपूर्ण गाउँपालिका–५ का ४७ वर्षीय लङबहादुर नेपाली, सोही स्थानका १९ वर्षीय अरविन विक, ६२ वर्षीय थमबहादुर सार्की, ४२ वर्षीय पूर्णबहादुर नेपाली र अन्नपूर्ण गाउँपालिका–६ हाइजुङका २२ वर्षीय ग्रिस क्षेत्री रहेका छन् ।

हाल उनीहरू सबैमाथि विस्तृत अनुसन्धान जारी रहेको प्रहरीले जनाएको छ ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन