आइएमई लाइफको सिइओमा पवन कुमार खड्का नियुक्त, बेलायतबाट चार्टर्ड एकाउन्टेन्ट, १८ वर्षको कार्यानुभव

BFIS News
2024 Nov 26 22:00

आइएमई लाइफको सिइओमा पवन कुमार खड्का नियुक्त, बेलायतबाट चार्टर्ड एकाउन्टेन्ट, १८ वर्षको कार्यानुभव

काठमाडौं । आइएमई लाइफ इन्स्योरेन्स कम्पनीले पवन कुमार खड्कालाई प्रमुख कार्यकारी अधिकृतमा नियुक्त गरेको छ । केहि दिन अगाडी मात्रै सूर्यज्योति लाइफ इन्स्योरेन्स कम्पनीबाट बाहिरिएका खड्कालाई कम्पनीको सञ्चालक समितिले उनलाई चार वर्षका लागि प्रमुख कार्यकारी अधिकृतको जिम्मेवारी दिएको हो ।

बैंक वित्तीय संस्था तथा कर्पोरेट क्षेत्रमा गरेर करिव १८ वर्षको अनुभव हासिल गरिसकेका खड्काको प्रमुख कार्यकारी अधिकृतको यात्रा भने साविक सूर्य लाइफ इन्स्योरेन्स कम्पनीबाट सुरुवात भएको थियो । उनि २०७८ असारमा सूर्या लाइफको सिइओ बनेका थिए । २०७९ पुस महिनामा साविक सूर्या लाइफ र ज्योति लाइफ मर्जर भएर सूर्यज्योति लाइफ बने पछि भने उनि बरिष्ट नायव प्रमुख कार्यकारी अधिकृत बनेका थिए । मर्जर पछि करिव करिव दुई वर्षको दौरान पछि उनले कम्पनी छाडेर आइएमई लाइफ रोजेका हुन् ।

काममा दक्ष मानिने खड्काले बेलायतबाट चार्टड एकाउन्टेन अध्ययन गरेका छन् । नेपाल लाइफ इन्स्योरेन्समा समेत काम गरेका उनले उत्पादन तथा प्रशोधन, हाइड्रो, शिक्षा, अडिटिङ, फाइनान्सियल कन्सल्टिङ लगायतका क्षेत्रमा १८ वर्ष भन्दा लामो समय काम गरिसकेका छन् । उनि बीमा कम्पनीको उच्च व्यवस्थापन तहमा ६ वर्ष भन्दा लामो समय काम गरिसके पछि सिइओ बनेका थिए ।

आइएमई लाइफले यस पटक बजारबाट खुला प्रतिस्पर्धा गराएरै प्रमुख कार्यकारी नियुक्त गरेको हो । बजारमा नाम चलेका सिइओ तथा डिसिइओलाई नै अन्तर्वार्ता लिएर कम्पनीले छनोट गरेको हो । कबि फ्याल बाहिरिए सँगै आइएमई लाइफ गएको भदौ महिनादेखि प्रमुख कार्यकारी अधिकृत विहिन थियो ।

सञ्चालक समितिले नियुक्त गरे पछि बीमा प्राधिकरणमा भने जानकारी गराउनु पर्छ । पछिल्लो समय बीमा प्राधिकरणले सम्बन्धित कम्पनीलाई नै प्रमुख कार्यकारी अधिकृत नियुक्तिको लागि जिम्मेवार बनाउदै आएको छ ।

खड्काका लागि आइएमई लाइफको ब्राण्डिङ र शाखलाई बढाउनु पर्ने चुनौती रहेको छ । कम्पनीले प्रमिमियममा आइपिओ निष्काशन गरेर पूँजीकोषमा बलियो बनाए जस्तै जीवन बीमा व्यवसायमा थप छलाङ मार्दै द्रुत गतिमा अगाडी बढाउनु पर्ने अवस्था रहेको छ ।