पञ्चकन्या समूहद्वारा कविता नेपालीको एभरेस्ट र लोत्से शिखर आरोहणमा आर्थिक सहयोग

काठमाडौं, चैत ३० । पितृसत्तात्मक पुरातनवादी सोचलाई तोड्दै नेपाली महिलाको साहस, आत्मबल र क्षमताको गौरवपूर्ण प्रतिनिधित्व गर्दै पञ्चकन्या समूहले कलाकार तथा फिटनेस आइकन कविता नेपालीलाई एभरेस्ट र लोत्से (जुम्ल्याहा) शिखर आरोहणका लागि आर्थिक सहयोग गरेको छ।

कविता नेपालीको यो महत्वाकांक्षी अभियान २०८१ सालको चैत ३० गतेबाट प्रारम्भ हुनेछ। पञ्चकन्या समूहले यो सहयोग आफ्नो संस्थागत सामाजिक उत्तरदायित्व (CSR) अन्तर्गत महिला सशक्तिकरणमा दिएको निरन्तर समर्थनको एक अंशका रूपमा गरेको जनाएको छ।

समूहका प्रबन्ध निर्देशक प्रदिप कुमार श्रेष्ठका अनुसार, “कविता नेपालीले नृत्य, मार्सल आर्ट र फिटनेस क्षेत्रमा अन्तर्राष्ट्रिय स्तरमा प्राप्त गरेको सफलताको अनुभवलाई अब हिमाल आरोहणमार्फत अझ फराकिलो सन्देश दिन लागेकी छन्। यस अभियानमा हाम्रो हातेमालो केवल आर्थिक मात्र नभई भावनात्मक र प्रेरणादायक रूपमा पनि हो।”

कविता नेपालीले सन् २०१८ मा ‘बुगी वुगी इन्टरनेसनल’ नृत्य प्रतियोगिता जितिसकेकी छन् भने चिनियाँ मार्सल आर्टमा पनि पोख्त छिन्। अब, उनले हिमालय चढ्दै नेपाली महिलाको स्थायी शक्ति र आत्मविश्वासको सन्देश विश्वभर पुर्याउने पञ्चकन्याको विश्वास छ।

उचाइमा पुग्ने अभियानमा निरन्तरता

महिलाको नेतृत्वलाई उचाइमा पुर्‍याउने प्रयासमा पञ्चकन्या समूहले लामो समयदेखि योगदान दिँदै आएको छ। सन् २०१३ मा आफ्नो स्थापनाको ४० औं वार्षिकोत्सवमा समूहले सेभेन समिट्स महिला टोलीलाई अफ्रिकाको सर्वोच्च शिखर माउन्ट किलिमान्जारो चढ्न सहयोग गर्दै आफ्नो ब्यानर चुचुरोमा पुर्याएको थियो। त्यसपछिका वर्षहरूमा निशा अधिकारी, डा. प्रिती भुसाल र पाँचजना पत्रकार महिलाहरूको एभरेस्ट आरोहणमा पनि पञ्चकन्याको सहयोग र प्रेरणा रहँदै आएको छ।

महिलाको आत्मबलमा लगानी

पञ्चकन्या समूहको CSR रणनीति शिक्षा, वातावरण, महिला सशक्तिकरण, स्वास्थ्य तथा सरसफाई, र सिप विकास गरी पाँच प्रमुख क्षेत्रमा केन्द्रित रहेको छ। यस मार्फत समूहले समावेशी, नैतिक र दिगो विकासमा आफूलाई समर्पित राखेको छ।

समूहका प्रवक्ताले भने, “कविताको यो यात्रा केवल हिमाल चढ्ने होइन, यो विश्वभरका साहसी मानिसहरूका लागि प्रेरणा बन्ने छ। हामी उनलाई साथ दिन पाएकोमा गौरव गर्छौं, किनभने उनले नेपालको कथा र साहसलाई संसारको सर्वोच्च स्थानमा पुर्याउँदैछिन्।”

पञ्चकन्या समूह

“ठोस प्रतिबद्धता” को सिद्धान्तमा आधारित पञ्चकन्या समूह नेपालकै एक सम्मानित औद्योगिक घराना हो। समूहले देशको पूर्वाधार, सामाजिक लगानी र मानव क्षमताको विकासमा महत्त्वपूर्ण योगदान दिँदै आएको छ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन