![$adHeader[0]['title']](https://www.bfisnews.com/images/bigyapan/1774272772_1769061114-ss-nimb.gif)
नेपाल बैंकको नाफामा २०३३ प्रतिशतको चमत्कारी उछाल, प्रतिशेयर आम्दानी २५ रुपैयाँ नाघ्यो
- BFIS News
- 2025 Apr 19 16:56
काठमाडौं । नेपाल बैंक लिमिटेडले आर्थिक वर्ष २०८१/८२ को तेस्रो त्रैमाससम्म उल्लेखनीय वित्तीय प्रगति गर्दै २ अर्ब ७८ करोड ३४ लाख रुपैयाँ खुद नाफा आर्जन गरेको छ। यो अघिल्लो वर्षको सोही अवधिको तुलनामा २,०३३ प्रतिशतले बढी हो, जुन ऐतिहासिक रुपमा अत्यधिक वृद्धि हो। अघिल्लो वर्ष यो नाफा केवल १३ करोड रुपैयाँमा सीमित थियो।
बैंकको नाफा वृद्धि पछाडि प्रमुख कारकहरूमा इम्पेयरमेन्ट चार्जमा व्यापक गिरावट पर्नु मुख्य कारण हो। चालु वर्षमा इम्पेयरमेन्ट चार्ज ३ अर्ब ६६ करोड रुपैयाँबाट घटेर २८ करोड २८ लाखमा झरेको छ, जसले बैंकको आम्दानीमा उल्लेखनीय योगदान पुर्याएको छ। त्यस्तै, खुद ब्याज आम्दानी पनि ४.८१ प्रतिशतले वृद्धि भई ७ अर्ब १० करोड रुपैयाँ पुगेको छ।
संचालन आम्दानी ८ अर्ब ५६ करोड रुपैयाँ पुगेको छ भने सञ्चालन नाफा ६३६.८१ प्रतिशतले उकालो लाग्दै ४ अर्ब ३१ करोड रुपैयाँ पुगेको छ। बैंकको अन्य वित्तीय सूचकहरू पनि सकारात्मक देखिएका छन् — जस्तै प्रति सेयर आम्दानी (EPS) २५.२६ रुपैयाँ रहेको छ भने प्रति सेयर नेटवर्थ २६०.७४ रुपैयाँ पुगेको छ। बैंकको चुक्ता पुँजी १४ अर्ब ६९ करोड रुपैयाँ र जगेडा कोष २३ अर्ब ३१ करोड रुपैयाँ रहेको छ।
यसबाहेक, बैंकले हाल ३० करोड ६२ लाख रुपैयाँ बराबरको नगद लाभांश वितरण गर्न सक्ने वित्तीय हैसियतमा छ, जसअनुसार करिब २.७८ प्रतिशत नगद लाभांश सम्भव देखिएको छ।
परिसंपत्ति र कर्जातर्फ पनि बैंकले दोहोरो अंकको वृद्धि हासिल गरेको छ। ग्राहकबाट जम्मा निक्षेप १०.८२ प्रतिशतले बढेर ३१३ अर्ब ७२ करोड रुपैयाँ पुगेको छ भने कर्जा लगानी १०.९६ प्रतिशतले उकालो लाग्दै २१६ अर्ब ९ करोड रुपैयाँ पुगेको छ।
यसका साथै, बैंकको Cost of Fund घटेर ३.९६ प्रतिशतमा झरेको छ भने Base Rate ५.९६ प्रतिशतमा कायम छ। यद्यपि, Non-Performing Loan (NPL) केही वृद्धि भई ५.४५ प्रतिशत पुगेको छ।
नेपाल बैंकले चालु आर्थिक वर्षमा खर्च कटौती गर्दै आम्दानी वृद्धिमा केन्द्रित रणनीति अवलम्बन गरेपछि यो उल्लेखनीय प्रगति सम्भव भएको देखिन्छ। विशेषतः इम्पेयरमेन्ट चार्जमा नियन्त्रण, ब्याज आम्दानीको सुधार, र सञ्चालन खर्चमा दक्ष व्यवस्थापनले बैंकलाई ऐतिहासिक नाफा दिलाउन सफल बनाएको छ।
शेयर गर्नुहोस
प्रतिक्रिया दिनुहोस्
सम्बन्धित समाचार
प्रतिक्रिया