पूर्वराष्ट्रपति जो बाइडेनलाई प्रोस्टेट क्यान्सर पुष्टि, स्वास्थ्य अवस्थाबारे परिवारले गरिरहेको छ समीक्षा

वासिङ्टन, अमेरिका। अमेरिकाका पूर्वराष्ट्रपति जो बाइडेनलाई प्रोस्टेट क्यान्सरको आक्रामक रूप देखिएको पुष्टि भएको छ।

पारिवारिक स्रोतका अनुसार क्यान्सरको असर उनको हड्डीसम्म फैलिएको छ र उपचारका विकल्पहरूको समीक्षा भइरहेको छ।

शुक्रबार संक्रमण पुष्टि भएपछिको जानकारीलाई पुष्टि गर्दै आइतबार बाइडेनको कार्यालयले एक विज्ञप्ति सार्वजनिक गरेको थियो। विज्ञप्तिमा ८२ वर्षीय डेमोक्र्याट नेता बाइडेनको पिसाबमा प्रोस्टेट नोड्यूल देखिएको जनाइएको छ, जुन प्रोस्टेट क्यान्सरको एक गम्भीर लक्षण मानिन्छ। विज्ञप्तिअनुसार क्यान्सर हार्मोन–संवेदनशील देखिएको र यसका लागि प्रभावकारी उपचार आवश्यक पर्ने उल्लेख गरिएको छ।

बाइडेनका छोरा बो बाइडेनको पनि केही वर्षअघि क्यान्सरका कारण निधन भएको थियो।

अमेरिकी पूर्वराष्ट्रपति डोनाल्ड ट्रम्पले यो समाचारप्रति प्रतिक्रिया दिँदै बाइडेनप्रति सहानुभूति व्यक्त गरेका छन्। ट्रुथ सोसलमा प्रकाशित सन्देशमा ट्रम्पले भने, “हामी जोको शीघ्र र सफल स्वास्थ्य लाभको कामना गर्दछौं र उहाँकी पत्नी जिल बाइडेन तथा परिवारका अन्य सदस्यहरूप्रति विशेष सहानुभूति प्रकट गर्दछौं।”

उपराष्ट्रपति कमला ह्यारिसले पनि बाइडेनप्रति शुभकामना व्यक्त गर्दै भनिन्, “जो एक लडाकु हुन्। मलाई थाहा छ, उहाँले यस चुनौतीको सामना शक्ति, लचिलोपन र आशावादका साथ गर्नुहुनेछ, जसले सधैँ उहाँको जीवन र नेतृत्वलाई परिभाषित गर्दै आएको छ।”

अमेरिकी क्यान्सर सोसाइटीका अनुसार प्रोस्टेट क्यान्सर पुरुषहरूमा सबैभन्दा सामान्य क्यान्सर हो, र अमेरिकामा आठमध्ये एक पुरुषले आफ्नो जीवनकालमा यो रोग सामना गर्ने गरेका छन्। रोगको प्रारम्भिक अवस्था पहिचान भएमा उपचार सम्भव भए पनि यो पुरुषमा क्यान्सर र क्यान्सरजन्य मृत्युको दोस्रो प्रमुख कारण बनेको छ।

बाइडेनको क्यान्सरमा ‘ग्लेसन स्कोर ग्रेड समूह ५’ को स्तर देखिएको छ, जुन रोगको गम्भीर अवस्था संकेत गर्ने मापदण्ड हो। ग्लेसन स्कोर १० सम्म जान सक्ने र ग्रेड ५ लाई उच्चतम जोखिमको रूपमा लिइन्छ।

बाइडेनले यो वर्षको जनवरीमा अमेरिकी इतिहासकै सबैभन्दा वृद्ध राष्ट्रपतिका रूपमा कार्यकाल पूरा गरेका थिए। आफ्नो स्वास्थ्य र उमेरबारे उठेका प्रश्नका बाबजुद उनले सक्रिय राजनीति सम्हाल्दै डेमोक्र्याट पार्टीका तर्फबाट उपराष्ट्रपति कमला ह्यारिसलाई राष्ट्रपतिको उम्मेदवारका रूपमा अघि सारेका थिए।

गत वर्षको राष्ट्रपतीय चुनावमा पराजित भएकी ह्यारिसको उम्मेदवारीपछि बाइडेनको तुलनामा जनसमर्थन बढेको देखिएको थियो। यद्यपि, अन्ततः ट्रम्पसँगको प्रतिस्पर्धामा उनी पराजित भएकी थिइन्।

राजनीति विश्राम गर्नु अघि बाइडेनले आफ्ना आलोचकहरूलाई सम्बोधन गर्दै पटक–पटक भनेका थिए, “मलाई हेर्नुहोस्।” तर स्वास्थ्य अवस्था, संज्ञानात्मक क्षमता र आन्तरिक राजनीतिक दबाबका कारण उनले पुनः उम्मेदवारी नदिने निर्णय गरेका थिए।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

८ जिल्लामा विद्युत प्रणाली सुधारको काम सुरु

बिल एकम्यानको रणनीति : सस्तो सेयर किनेर व्यवस्थापन आफ्नै हातमा लिने

तीन कम्पनीको सेयर मूल्य समायोजन