नेपाल इम्प्याक्ट इन्भेष्टमेन्ट फोरम २०२५ काठमाडौंमा सम्पन्न: विदेशी लगानी, महिला उद्यमशिलता र हरित वित्तमा केन्द्रित

काठमाडौं, जेठ २५ गते। नेपाल बैंकर्स एसोसिएसन (NBA) को संयोजनमा Invest for Impact Nepal (IIN) र नेपाल प्राइभेट इक्विटी एशोसिएसन (NPEA) को सहकार्यमा नेपाल इम्प्याक्ट इन्भेष्टमेन्ट फोरम २०२५ भव्य रुपमा सम्पन्न भएको छ। यो ऐतिहासिक कार्यक्रमले नेपालको इम्प्याक्ट इन्भेष्टमेन्ट इकोसिस्टमलाई सुदृढ गर्दै अन्तर्राष्ट्रिय लगानीकर्ता र स्वदेशी सरोकारवालाबीच सहकार्य र सम्बन्ध विस्तार गर्न महत्वपूर्ण भूमिका खेलेको छ।

फोरमले विकास वित्तीय संस्था (DFIs), इम्प्याक्ट लगानीकर्ता, वित्तीय संस्था, सरकारी प्रतिनिधिहरू, नियामक निकाय, प्राइभेट इक्विटी तथा भेन्चर क्यापिटल कोष, र निजी क्षेत्रका अन्य प्रमुख खेलाडीहरूबीच रणनीतिक संवादलाई प्रोत्साहन गरेको थियो। साझा चासोका क्षेत्रहरू पहिचान गर्दै दीगो लगानी र समावेशी आर्थिक वृद्धिको मार्ग खोल्ने उद्देश्य राखिएको कार्यक्रम विविध छलफल र नेटवर्किङ सत्रहरूमा समृद्ध बन्यो।

कार्यक्रमको उद्घाटन सत्रमा अन्तर्राष्ट्रिय आर्थिक सहकार्य समन्वय महाशाखा, अर्थ मन्त्रालयका सहसचिव धनीराम शर्मा प्रमुख अतिथिका रूपमा उपस्थित भएका थिए। कार्यक्रममा विभिन्न उच्चस्तरीय प्रविधिक सत्रहरू सञ्चालन गरिएका थिए।

विदेशी लगानी प्रवाह बढाउने विषयमा आयोजित पहिलो सत्र नेपाल राष्ट्र बैंकका डेपुटी गभर्नर बम बहादुर मिश्रको अध्यक्षतामा सम्पन्न भयो, जसमा बहुआयामिक विज्ञहरू सहभागी थिए।

दोस्रो सत्र, जसमा वित्तीय संस्थाहरूको जलवायु संक्रमण योजनाको भूमिकाबारे छलफल गरियो, BII का प्रबन्ध निर्देशक तथा सामान्य कानूनी सल्लाहकार कोलिन बक्लीको अध्यक्षतामा सम्पन्न भयो।

तेस्रो सत्रमा नेपालमा प्राइभेट इक्विटी र भेन्चर क्यापिटल (PEVC) उद्योग विस्तारका रणनीतिहरूबारे छलफल गरियो, जुन नेपाल धितोपत्र बोर्डका कार्यकारी निर्देशक डा. नवराज अधिकारीले अध्यक्षता गरेका थिए।

त्यसैगरी, महिला उद्यमीहरूलाई वित्तीय पहुँच सुलभ गराउने विषयमा केन्द्रित सत्र नेपाल राष्ट्र बैंकका कार्यकारी निर्देशक डा. सत्येन्द्र तिमिल्सिनाको अध्यक्षतामा सम्पन्न भयो।

माइक्रोफाइनान्स संस्थाहरूको बृद्धिका लागि विदेशी लगानीको भूमिकाबारे भएको अर्को सत्रमा नेपाल राष्ट्र बैंकका निर्देशक विज्ञानराज सुवेदीले अध्यक्षता गरेका थिए।

यी प्रविधिक सत्रहरूका साथै, निजी तथा अन्तर्राष्ट्रिय लगानीकर्ताहरूबीच प्रत्यक्ष भेटघाट तथा एक-एक बैठकहरू पनि आयोजना गरिएको थियो, जसले लगानी तयारी, नियामक ढाँचा, क्षेत्रगत अवसरहरू र सहकार्यका सम्भावनाहरूमा गहन छलफल गर्न अवसर प्रदान गर्‍यो।

कार्यक्रममा १४ भन्दा बढी अन्तर्राष्ट्रिय संस्था, जसमध्ये DFI तथा प्रमुख इम्प्याक्ट लगानीकर्ता समेत थिए, साथै अर्थ मन्त्रालय, नेपाल राष्ट्र बैंक, धितोपत्र बोर्ड, कूटनीतिक नियोगहरू, विकास साझेदार, राष्ट्रिय तथा अन्तर्राष्ट्रिय लगानी संस्था, बैंक तथा वित्तीय संस्था (BFIs) र सञ्चारकर्मीहरूको उल्लेखनीय सहभागिता रहेको थियो। नेपाल इम्प्याक्ट इन्भेष्टमेन्ट फोरम २०२५ ले नेपालको दीगो र समावेशी आर्थिक विकासको यात्रामा एक सशक्त कोसेढुंगा थपेको छ।

प्रतिक्रिया दिनुहोस्

सम्बन्धित समाचार

गरिब देशहरुको सहयोगका लागि विश्व बैंकको ९३ अर्ब डलरको वित्तीय प्याकेज

१० वाणिज्य बैंकले ४ महिनामै कमाए अर्ब बढी नाफा, एनआइसी एसियाको सबैभन्दा धेरै

खप्तड लघुवित्तले आईपीओ जारी गर्ने, बिक्री प्रबन्धकमा प्रभु क्यापिटल नियुक्त

तीन कम्पनीको सेयर मूल्य समायोजन

विद्युत खपत बढाउन प्राधिकरणले सुरु गर्यो अभियान

भ्याल्यू स्टक भनेको के हो, कसरी छान्ने यस्ता सेयर ?