![$adHeader[0]['title']](https://www.bfisnews.com/images/bigyapan/1759825227_1100x100.gif)
मनसुनमा पनि काठमाडौंमा मेलम्चीको खानेपानी आपूर्ति जारी रहने : मन्त्री यादव
- BFIS News
- 2025 Jun 17 11:04
काठमाडौं, असार ३। जल आपूर्ति मन्त्री प्रदीप यादवले मनसुनको समयमा पनि मेलम्ची खानेपानी काठमाडौं उपत्यकामा नियमित आपूर्ति हुने बताएका छन्।
उनले सोमबार सिन्धुपाल्चोकको रिबर्मा खोलानजिक निर्माण गरिएको नयाँ पानी ट्याङ्कीको निरीक्षणपछि यस्तो आश्वासन दिएका हुन्।
“काठमाडौं उपत्यकामा खानेपानीको अबाध आपूर्ति सुनिश्चित गर्न यहाँ नयाँ ट्याङ्की परीक्षण गरिएको छ,” मन्त्री यादवले बताए। मेलम्ची खानेपानी आयोजनाअन्तर्गत सावधानी स्वरूप निर्माण गरिएको यो ट्याङ्कीले मनसुनमा पानीको अभाव हुन नदिन मद्दत गर्ने उनले स्पष्ट पारे।
विगतमा मेलम्ची खोलामा आएको बाढीका कारण वर्षायाममा खानेपानी आपूर्ति अवरुद्ध हुने समस्या भएको उल्लेख गर्दै मन्त्री यादवले भने, “सरकार उपत्यकामा दिगो र भरपर्दो खानेपानी आपूर्ति प्रणाली स्थापना गर्न प्रतिबद्ध छ।”
मेलम्ची खानेपानी विकास समितिका कार्यकारी निर्देशक तथा इञ्जिनियर रत्न प्रसाद लामिछानेले नयाँ संरचनाबाट मेलम्ची सुरुङमार्फत काठमाडौंमा दैनिक ५० देखि ७० मिलियन लिटर पानी आपूर्ति सम्भव भएको जानकारी दिए।
“सबै आवश्यक भौतिक संरचना तयार भइसकेका छन्। खोलाको पानी नयाँ ट्याङ्कीमार्फत मेलम्ची सुरुङमा पठाइनेछ, जसले उपत्यकामा नियमित आपूर्ति सुनिश्चित गर्छ,” लामिछानेले भने।
उनका अनुसार सुरुङ र वितरण प्रणालीको आवश्यक मर्मतसम्भार सम्पन्न गरिएको छ, जसले आपूर्ति अवरोध हुने सम्भावनालाई न्यून बनाउँछ।
करिब चार वर्षअघि आएको विनाशकारी मेलम्ची बाढीले स्थानीय बस्ती मात्र होइन, मेलम्ची खानेपानी आयोजना समेतमा ठूला क्षति पुर्याएको थियो। त्यसयता पटक–पटक आपूर्ति अवरुद्ध हुँदै आएको छ, जसले काठमाडौं उपत्यकाको खानेपानी संकटलाई अझ गम्भीर बनाएको छ।
शेयर गर्नुहोस
प्रतिक्रिया दिनुहोस्
सम्बन्धित समाचार
.jpeg)
प्रतिक्रिया